eSefarad Noticias del Mundo Sefaradi
PROBLEMA DJIDIÓ
Viene el djidió Hayim ond`el haham, dize: «Haham, me kero kazar.»
Dize el haham: «Bien, Hayim, besimán tov. En bon`ora ki ti sea!»
Dize el djidió: «Sólo, si me kazo kun eya, su padre me va matar!»
Dize el haham: «Intonses ki no te kazes.»
Dize él: «Yo la amo tanto, ke si no me kazo, intonses me vo matar solo!»
Dize el haham: «Intonses ki ti kazes.»
Dize él: «Na, mira, eya tiene dos ermanos, komo dos almarios. Sí! Me pueden yevar los dientes. Me van matar por siguro!»
Dize el haham: «Intonses ki no te kazes.»
Dize él: «Mira, eya me disho ke si no me kazo kon eya, eya se va matar!»
Dize el haham: «Intonses es mitsvá ki ti kazes.»
Dize él: «Mira haham, si me kazo, mi padre tamién no me va dar ni un grosh!»
Dize el haham: «Saves, Haymke, vate agora ond`el hodja, dígale ke keres trokar la relijión!»
Dize Haim: «Bien, haham, sólo no veo komo esto va solver mi problema.»
Dize el haham: «Tu problema, no lo sé. Mi problema ya va solver!»
Kontado por ELIEZER PAPO – 1993
Redaktado por MATILDA KOEN-SARANO
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
