eSefarad Noticias del Mundo Sefaradi
Los tres amigos i la rikeza
Avía tres amigos proves ke kerían tanto azersen rikos.
El uno dizía: «Ah, si yo tinía una butika, iva dar a komer a los menesterozos!»
El sigundo dizía: «Ah, si yo tinia una kamareta, iva avrir una eskola i iva azer estudiar a los proves sin parás.»
El treser dizía: «Yo si tinía una buena mujer, ya me abastava.»
Vino Eliau Anaví, le dio al uno una butika, al sigundo una kaza de estudios, i le disho al treser: «Suve arriva, da a la puerta i demanda una kupa de agua.»
El ombre suvió arriva, dio a la puerta le avrió una mujer. El le demandó una kupa de agua. Eya le disho: «Kon plazer!!» i se la dio. Los dos se namoraron i se kazaron.
Pasó muncho tiempo i Eliau Anaví tornó ande los tres amigos. Fue ande el primer ke se izo riko i lo provó. Se travistió de prove i le disho: «Dame alguna koza de komer, te rogo. Tengo muncha ambre!»
Le disho el ombre: «Yo de baldes no do nada!»
«A!» le disho Eliau Anaví, «No es esto lo ke dishites kuando te di la butika!» i se la tomó.
Fue ande el sigundo, vistido de estudiante prove, i le disho: «Kero muncho estudiar, ma no tengo dinero…»
Le disho él: «Si no me pagas, no puedes estudiar akí.»
Vino Eliau Anaví i le tomó la kaza de estudios.
Fue Eliau Anaví ande el tresero, ma él no estava en kaza. Le avrió la mujer. Le disho Eliau Anaví, en forma de sedakero: «Tengo ambre, esto kansado, no sé ande ir…» Le disho eya: «Ven, entra, te daré a komer… Repózate.» Eliau Anaví komió, bevió i se durmió.
Entró el marido i vido un viejo ay durmiendo. Le demandó a la mujer: «Ken es éste ke está durmiendo akí?» Le disho la mujer: «Es un sedakero. No tinía kualo komer i ande ir…».
«Muy bueno izites, mujer!» le disho el marido.
Se alevantó Eliau Anaví i le disho: «Tú izites el echo mijor. Tú tienes la verdadera rikeza, ke no se va despareser nunka. Bive orozo kon tu mujer i toda tu famiya.»
Kontado por MATILDA KOEN-SARANO – 2014
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
Muy bonita la historia y reflexiva.
Saludos