eSefarad Noticias del Mundo Sefaradi
Parientés altolokada
Avía un gvir ke dava sedaká a los proves, ma tinía sus oras fiksas para dar. Tinía un plakato enriva de la puerta, ande estava eskrito: Se resive de las onze a la una.
Vino un prove a demandar la sedaká, kijo entrar, ma le disho el portalero: «No vites el plakato? Mankan pokos minutos a la una. No puedes entrar!»
El prove kedo muy mal: Kualo ke aga? Kualo ke aga? Está muerto de ambre!
Le disho al portalero: «Dile a tu patrón ke vino el kunyado del Dio.»
Kuando el portalero se lo disho el patrón, éste le disho: «Addió, el kunyado del Dio! Azelo entrar pishín!»
El prove entró i el gvir le dio a komer i a bever, le dio un paketo de ropas i un par de kalsados bueno.
El prove le disho: «Munchas grasias! Munchas grasias!» i fue a la puerta para salir.
Antes ke saliera le demandó el gvir: «Dime, komo sos el kunyado del Dio?»
Le disho el prove: «Avía dos ermanas, una la tomí yo i la otra la tomó el Dio, ansí me izi kunyado del Dio!»
Kontado por MATILDA KOEN-SARANO – 2014
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
