eSefarad Noticias del Mundo Sefaradi
Las almoranas
Djohá una demanyana se sintió mal, tenía las almorranas tanto unfladas, de no pueder asentarse.
El desmichado korió ande el viejo doktor del kazal i kon difikultá asperó su torno una ora en pies. A la fin el doktor lo resivió.
Kuando entró en la klinik, el doktor le preguntó kon otoridad: » Djohá, ke te pasa?» Djohá le dio a entender sus sufriyensas. Le disho: «Es una koza de no pueder resistir».
El doktor lo miró en la kara kon las sejas engruvinyadas i le disho: «Avre la boka».
Djohá se enkantó, él ke se asperava ke el doktor le va demandar de abashar su shalvar, le preguntó de avrir la boka!
`Koza kurioza,` se disho Djohá de sí para sí, i le disho: » Kualo? Komo es posible? Por las almoranas ke avre la boka?»
El doktor le kortó la palavra i le disho kaji gritando: «Djohá, ken es el doktor? Tu o yo? Aze lo ke te digo!»
Djohá sin remedio se sotometió i avrió la boka.
El doktor de leshos le echó un ojo ariento la boka, se hue a su meza, se asentó i le eskrivió una resefta, en dándoles unos 10 hapes.
Una vez ke Djohá tomó la resefta, miró de meldarla, ma no entiendó nada. Asperó unas kuantas segundas, se abokó en dándole la atrazera al doktor i le disho: «Doktor, asi bivas tú, una vez ke ya vine fin akí, te rogo, mírame a las agayas!!»
Kontado por SELIM SALTI – 2007
Redaktado por Matilda Koén-Sarano
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
