eSefarad Noticias del Mundo Sefaradi
La ventana
Kuando me asentí a komer kon mi marido por la primera vez después ke mos kazimos, él me demandó ke mos asentemos al lado de la ventana i ke tengamos los dos vidros aviertos.
Me disho: «Veremos komo es tu kumida. Si alguna koza no va star buena, vamos a poder echarla por la ventana!»
Kon el tiempo mi marido me demandó ke sólo media ventana ste avierta.
Oy ya kome kon la ventana serrada!
Kontado por MALI DALLAL – 1989 Yerushaláyim
Notado i redaktado por Matilda Koén-Sarano
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
