eSefarad Noticias del Mundo Sefaradi
El vistido de piedra
Avía un rey ke no kería bien a los djidiós i bushkava siempre de azerle mal.
Un día lo yamó al haham de la komunitá i le disho: «Vozotros me devésh azer un vistido de piedra. Si no me lo vash azer vos meter todos en prezión.»
Un vistido de piedra? Komo se aze? El haham yamó al kal a todos los djidiós i les disho ke agan tres días de ayuno i de rogativas al Dio, ke se apiade de eyos.
El haham reunió el konsilio de la komunitá i demandó si alguno de los miembros savía komo azer un vistido de piedra, ma dinguno no lo supo.
Mientres ke el haham estava avlando, estava ayá su inyeta, una ijika de 12 anyos ke estava sintiendo. Eya se entrometió i disho: «Yo v’a ir a responder al rey!»
Le disheron todos: «Tú? Kualo saves tú?»
«Deshame ir!» disho la ijika i tanto izo ke la desharon ir.
Kuando estuvo delantre del rey, eya le disho: «Ya v’a azer yo el vistido de piedra, ma para poderlo azer kale ke koma 5 kioftikas de buz.»
«Kioftikas de buz?» disho el rey, «Komo se azen la kioftikas de buz?»
«Esto es!» disho eya,»Si no me vash azer las kioftikas de buz, yo no vo azer el vistido de piedra!»
I ansí la ijika salvó a todos los djidiós de la prezión (i el rey kedó kon sus mokos enkolgando).
Kontado por MATILDA KOEN-SARANO – 2016
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
Excelente.Quiero volver a mis raíces Sefarditas.