Las Notas de Matilda – Kuento: Djohá ladrón

Djohá ladrón

Aferraron a Djohá rovando i lo yevaron al djuzgo.

Avía un testimonio.

Le disho Djohá al djuzgador: “Puedo azer una demanda al testimonio?”

Le disho el djuzgador: “Sí, demanda”.

Le disho Djohá al testimonio: “Yo asemejo al ladrón o el ladrón asemeja a mí?”

Al testimonio se le tomó el meoyo i no supo kualo responder.

Entonses el djuzgador lo kitó líbero a Djohá.

Kontado por ALEX KORFIATIS – 2001
Notado i redaktado por Matilda Koén-Sarano

Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino