Las Notas de Matilda – Kantadores de la tradisión djudeo-espanyola: Ramón Tasat

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda kada djueves despues del Notisiario en Ladino .

Ramón Tasat
Kantor i kantador
(Buenos Aires, Argentina)

El Kantor Dr. Ramón Tasat nasió en Buenos Aires i se ambezó el ladino, la lingua de los sefaradís, sovre los djenoyos de su nona. Su estil reflekta la rika istoria i el drama de esta eskstraordinaria kultura. Su entrenamiento tuvo lugar en sinko diferentes paízes i él  resivió su doktorado en performansia vokal de la Universidad del Texas en Austin. Su disertasión de doktorado es entitolada «The Cantillations and Religious Poems of the Jews of Tanjer, Morocco» (Los Kantares  i los Poemas Relijiozos de los Djudiós de Tanjer, Marocco). El Kantor Tasat izo el tur de la Evropa kon el Dr. Robert Shaw, famozo en todo el mundo, i partisipó a festivales enternasionales de las dos partes del Atlántiko.
El Dr. Tasat aparesió en numerozas operas, inkluzo «Le Nozze di Figaro», «L’Impresario» i  «La Traviata», i resivió muy buenas krítikas mondiales, i aklamasiones por el públiko. Después ke sintió el konserto de la «Cantata Ebraica» de Ramón Tasat, el Rabino Samuel Weintraub remarkó ke  «Ramón Tasat es una perla. El kanta kon pasión i kon la téknika del «bel canto» verdadero.  Yo fui empresionado  por la tekstura semejante  de la múzika operístika i la tradisión liturjika djudía».
El tuvo munchas notables aparisiones en los mas prestijiozos teatros del mundo, de la California a la Fransia, de la Finlandia a la Espanya, de Israel a la Italia. Además de munchas aparisiones por radio i televizión, él resivió numerozos premios, inkluzo el primer lugar en la «The Montpellier Cultural Arts Center’s Recital Competition».
Las konferensias, los lavoros i los programas del Dr. Tasat espasian entre «The Music of Modern Israel»  i «Echoes of Sepharad» (La Múzika de la moderna Israel i los Ekos de Sefarad) .
Las numerozas gravasiones de Ramón Tasat inkluyen «Fiesta Sefarad», «Trees cry for rain» (Arvolés yoran por luvias), «Teshuvá», «Kantika de Amor i vida», una sería de duetos sefaradís endjuntos a la famoza kantadora Flory Jagoda, i su mas resiente «Yom she kuló shabat», i munchos  livros sovre sujetos muzikales djudiós.
El kantor Dr. Ramón Tasat es el hazán de la «Shirat Hanéfesh», una Kongregasión djudía en Montgomery County, MD. Además es el Prezidente de «Shalshelet»,»The Foundation for New Jewish Liturgical Music»  la Fondasión por la Mueva Múzika Litúrjika Djudia.

Escuchar: Como la roza en la guerta – Ramón Tasat