eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.
Nurit Henig
(Buenos Aires – Yerushaláyim)
Nurit Henig, nasida en Buenos Aires, es una de las kantaderas mas sovresaliente en Israel en el kampo del ladino, grasias a su boz keynte, onda i klara. Es lisensiada por la Akademia de Múzika a nombre de Rubín en Yerushaláyim i tiene el títolo de Artista en kanto. Es eleva de Juliette Madani z»l, i Mitsuko Shiray. Es spesializada en múzika klásika, israeliana, sud amerikana, ladino, turko-otomana i en imnos de la tradisión djudeo-espanyola. Es lisensiada del Sentro de Múzika Klásika del Oriente en tanyedura de ut i teoría de la múzika turka. Ay sesh anyos ke es eleva del Prof. Walter Feldman en kanto klásiko turko otomano i tanyedura de tambur (enstrumento a kuedras) i de pandero turko. Nurit es maestra de dezvelopamiento de la boz, i su sistema es orijinal i kreativo en una atmosfera plaziente, sigún las posibilitás del elevo. Su sistema no es sólo para kantadores, ma i para kada uno ke kere kantar para su dezvelopamiento spiritual. Eya ambezó en el Koro de la Oratoria en Yerushaláyim, aprontó para el bakaloreato i para «Kohav Nolad» (Nasió una estreya). Ambezó a kantadores konosidos en Israel i a grupos de la armada. Ay 9 anyos ke es maestra de dezvelopamiento de la boz en el Sentro de Múzika Klásika del Oriente en Yerushaláyim. Aparesió en varios rolos en la Nueva Opera Israelí, kantó kon la Orkestra de la Autoridad de la Radio, kon Orkestras de Kámera i en varios programas de radio. En el 1997 kitó un CD de kantigas en ladino, entitolado «Sekretos», kon el akompanyamiento del gitarrista Eyal Léber. Nurit partisipó por dos vezes al Festiladino (en el 2003 i el 2004) i yevó las kantigas ke intepretó asta la final. Además en el 2004 prezentó al Festiladino una kantiga suya, muzikada por Artur Abakov, entitolada «Kería». Eya aparese en todo Israel en konsertos de kantigas tradisionales i muevas en ladino. En los últimos dos anyos fondó kon el Prof. Walter Feldman el «Ensamble Sazkar», ke prezenta múzika ladino-otomana i imnos litúrjikos otomanos de los djudiós espanyoles, de la tradisión de los «Maftirim» en Turkía. En el 2007 salió el CD de la reprezentasión «live» de Nurit i el Prof. Feldman, ke tuvo lugar en el Teatro Inbal, entitolado «Ensamble Sazkar».
