eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Mireille Valero
Kantadera
(París, Fransia)
Mireille Valero nasió en París en el kartié «onze» (11), ande bivían todos los djudiós sefaradís, ande su famiya frekuentava la sinagoga de «Siete Kayes – Popincourt». Entre otros eya se akodra del Rabbi Eskenazi, ke era muy dulse. Kitó París muy djoven por Clichy Sous Bois, ande fueron a bivir otros ijikos komo Sylvie Vartan, François Feldman i Patrick Bruel. Es soprano kolorator, i fue formada por los kantadores de la Opera de París en kursos privados. Es eleva del profesor Talip Ozkán, ke es muy exijente. Eya aze onor a sus abuelos David i Sarah Tchiprout i a las otras miembras de las famiyas Tchiprout-Benezra, todas kantaderas, inkluzo su madre Rachel Tchiprout. Su primer kontakto kon la kultura sefaradía fue su abuela Sarah Tchiprout i un disko de Yeoram Gaón, ke eya deskuvrió en Israel kon amor.
Mireille interpreta los kantes sefaradís i la múzika klásika turka, i grasias al Internet arivó a konoser la múzika jitana de la Masedonia, la múzika klasika turka del Uzbekistán, del Kirgistán o del Uygur de la China. Mireille kanta también en ruso, italiano i espanyol.
Sus inspiratores en el kanto sefaradí son David Saltiel, Avraham Lopez Cardozo i Gloria Levy.
Se ambezó el ladino en «un dezierto de la alma» (palavras suyas), kon kasetas audio de Karen ?arhon, sin saver ke es su suvrina.
Aparesió en espektaklos en la Komunitás djudías de Fransia i Béljika, i desidió de kantar i en Montmartre. Kantó en el «Centro Jefroykin» kon el ayudo de Paul Spiegelman, akompanyada por Talip Ozkán i Eddy Shaff, i en el Sentro «Edmond Fleg» kon el akordeonista del Tsar de Bulgaría en la Banka Espanyola de Anversa kon el ayudo de Moïse Rahmani
Eya koleksiona livros kemados por la Inkizisión Espanyola, i ke por mirákolo fueron re-traduizidos del árabo i del ebreo por grandes universitarios i konstitúen kon el ayudo del Sinyor Kuperminck una librería de literatura sefaradía en la Alliance Israélite Universelle.
Está bushkando de teminar un livro ande kompara los uzos i kostumbres doméstikos de los djudiós, los gregos i los armenianos.
Mireille se metió a kantar «por sovrebivir» (palavras suyas).
