Las Notas de Matilda – Kantadores de la tradisión djudeo-espanyola: Liliana Benveniste

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

Liliana Benveniste
Kantadera, kompozitora i profesora
(Buenos Aires)

Liliana Benveniste nasió en Buenos Aires (Ardjentina), es kantadera i kompozitora. Sus abuelos i su padre nasieron en Estambol i arivaron a Argentina  serka del anyo 1927.

Eya estudió kanto en el Conservatorio Nacional de Musica Carlos Lopez Buchardo, i téknika vokal kon las profesoras Lucy Saborido i Leticia Caramelli. Estudió también gitarra i bayles. Es Analista de Sistemas i Profesora de Informátika y maestra de Ladino.

Tiene el kargo de Visepresidente del ‘Centro Cultural Sefarad‘ de Buenos Aires, ke dirija endjuto kon Marcelo Benveniste, i koordina los tayeres i kursos de la área kulturala del sentro, ande tambien se azen konsiertos, konferensas, festivales de filmos i mas.

Es membro de la Plataforma Erensya, kriada por el ‘Centro Sefarad-Israel‘ de Madrid, una red global de koperasión en la kuala los membros de diferentes paizes partajan los projektos que se realizan en sus komunidades para mantener las raízes kulturalas de Sefarad.

En agosto de 2016 fue nombrada membro del grupo SHADARIM (embajadores, emisarios) de la ANL –Autoridad Nasionala del Ladino i su Kultura– institusion kriada por el governo israelí kon sede en Yerushalayim.

En enero de 2018 aresivio la Medaya de las Kuatro Sinagogas Sefaradís de Yerushalayim en rekonosimiento por su lavoro kon la kultura sefaradí en todos sus modos i en mayo de ese mizmo ayo fue eskojida komo Embajadora de la Red de Djuderías de Espanya para América Latina.

Es profesora en tayeres, kursos i seminarios de Ladino presensyal i en linea, i también sovre muzica i kultura sefaradí en djeneral.

Kordina el siklo semanal RAÍZES DE SEFARAD, antes presensya, agora en linea,  ke ofrese konferensas de variados sujetos tokantes a la istoria i la kultura sefaradi kon profesores invitados i también es editora de la pajina web eSefarad.com y del Bulten eSefarad – Haberes del Mundo Sefaradí.

Es la kreadora i kondusidora del sikloo ENKONTROS DE ALHAD, una aktividad de moabetes semanales «en ladino» kon musafires de todo el mundo donde se tokan todo modo de sujetos.

Liliana se ambezó las primeras kantigas en ladino de su abuela paternal, Merkada, ke tanyia el pandero kada tadre i kantava kantigas en ladino.  Su abuelo Sabetay tanyia muy bien el ut, i en todas las reuniones de la famiya se kantava i se baylava múzika djudeo-espanyola i espanyola.

Liliana se dedika dezde aze 10 anyos a la investigasión i difuzión de la kultura sefaradía, i a ambezarse la lingua los kostumbres i las kantigas ke apartienen a este riko patrimonio  kultural.

Kompozó la múzika para varios poemas kontemporáneos eskritos en djudeo-espanyol, konvirtiéndolos en kantigas muevas, ke enrikesen el repertorio muzikal en ladino, resiviendo rekonosimientos internasionales, komo en el Festilandino del 2005, ande su kantiga «Alevántate Nisim», kon palavras de Beatriz Matzlíah arivó a la final de la kompetisión.

En el CD «Ayres Buenos»,  publikado por  Liliana, se topa la kantiga «Arvolés yoran por luvias»  ke su avuela kantava a su padre i el le kantava a eya kuando era kriatura. En su CD «Enkantes sefaradíes» tiene kantes tradiisonales, muevos i tangos trezladados al ladino.  LilianaBenveniste/Spotify

Liliana kolaboró también a la traduksión al ladino de tangos i kansiones folklórikas argentinas.

Prezentó sus espektaklos artístikos ke reflektan el patrimonio de la múzika sefaradía, rekreando kantes tradisionales, litúrjikos i muevos en djudeo-espanyol en emportantes lugares en de América Latina Norteamérika, Evropa, Afrika i Asia, i kontinua aziendolos. youtube.com/lilianabenveniste