eSefarad Noticias del Mundo Sefaradi
Por Rivka Abiry
Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.
Viza para la China
Mi plano era de topar un grupo en Evropa ke azen viajes a China. Para esto, komo una rezidente de Israel, tuve de obtenir aki, en Tel Aviv, un viza para la China. Ize lo menesterozo i me estamparon en mi pasaporto una pajina entera kon esta viza. La ajensia de viajes en Evropa me enrejistro por un viaje de 10 dias a Bejing i yo kon muncho gusto empesi kon los preparativos, meldar a este sujeto i arekojer rensenyamientos. El plano era ke yo devia bolar a Oslo, kon la kompanyia aerea Sabena i despues toparme ayi kon un grupo de touristos, prosedente de Helsinki. Mi enkontro definitivo kon el grupo, ke se yemava CTUT, seria el aeroporto de Beijing. Ansi fue planeado, pero en realidad rezultaron munchas komplikasiones non previstas.
En Oslo, mis bushkidas de djente ke tenian bolsas kon la etiketa CTUT, salieron vaziyas, pero yo no estuve preokupada. Kuando finalmente abashi en el Terminal 1 de Beijing, tomi mis validjas i entri en la sala de resepsion, onde enkontri un chiko grupo kon un gia, ajitando una bandiera kon las letras CTUT. Estuve alegre, kontente, ma presto me se izo klaro ke yo no ago parte de esto grupo pormodo ke mi nombre no se inklusio en la lista suya. Me desharon solika, akolgada, sin pueder azer nada. Entremientes en el terminal avia muncha jandarma i funksionarios chinezos, ke no savian ni en inglez, ni en fransez o aleman. Me embiyaron de aki ayi, fina la ofisina de Sabena, ke topi serrada, sin topar ayudo. Vos puedesh imajinar mi hal, olvidada en el Terminal 1 del aeroporto de Beijing, ke es 45 kms leshos de la sivdad, kon una populasion de mas de 13 miliones de djente. Kreeme ke realmente empesi a sentirme perdida. No vos olvidesh ke todo esto akontensio antes munchos anyos, antes de la Olimpiada i antes de edifikar en Beijing los Terminales II i III…
Era 8 de la demanyana, pero yo no savia ke azer. Entonses vide una eskrituria en unas de las gazetas chinezas anunsiando:
“MUJER AEDADA DE ISRAEL PERDIDA EN EL AEROPORTO DE BEIJING…”
Pero ken de mi famiya puedia meldar çhinez???
Me aserki de un soldado ke yevava un ramo de flores artifisiales, pero el me izo una kara tuerta i me desho komo una guerfanika, asentada sovre mi validja. Entonses me se aserko un touristo ke me akonsejo de tomar un taksi, de pagarle $40.- i darle instruksiones de yevarme a mi otel, para kual yo tenia aprontado un dokumento. Yo estava kontente de akseptar su konsejo, meti mis validjas en el taksi i me asenti sovre el banko de detras. En Beijing, los pasajeros se asentan solo en la parte de detras del taksi, porke ay una barriera entre el konduktor i el pasajero – una espesia de ventana de fierro.
Kuando el kamino kon el taksi tomo mas de media ora, empesi a dubiar, estuve desrepozada i preokupada, malgrado ke de vez en kuando no faltava de amostrar al konduktor del taksi el dokumento miyo. Siempre murmureo algo, ke no entendi, i el kontinuava. No avia manera de kommunikarme kon el. Es ansina ke pasimos munchas kalejas, ke estavan yenas de djente i de bisikletas. Kuando mos aleshimos muncho del aeroporto, vide de la ventana una zona industrial i entonses me abandono la pasensia miya. Tomi el dokumento i kaji lo apegi a la kara del konduktor, asta ke el presto detuvo el taksi, kito del karro las validjas, me izo entrar a traves de un portal enorme i me repusho en la entrada de un presiozo otel. Las chikas a la resepsion, trataron de ayudarme, ma mesmo aki kuando bushkaron en sus kashas los nombres de las yaves para las kamarates, no reusheron a topar mi nombre. Me desharon asentada en el kanape del vestibul, i yo aferrando mi validja, kon lagrimas en los ojos, me durmi. Estava kansa muerta.
Kuando me espertaron, me disheron ke visto ke yo era la unika tourista kon una viza de Israel, se izo un yerro, me metieron en una lista aparte, no endjuntos kon los otros del grupo, ke tenian un viza kolektivo, por modo ke todos eran rezidentes de uno i el mismo payis de Evropa. Ansina yo kayi entre dos siyas…
De ayi adelantre el tyempo ke pasi en Beijing i afuera de esta sivdad, fueron dias de “leche i miel”, un plazer, algo para kontar i rekordar.
En retornando a Evropa, arivi de muevo en la sivdad ande mora mi famiya. En arivando, rapidamente me apresuri a tomar mi validja para toparme kon mi famiya i kontarles los evenimientos interesantes ke me pasaron. Ma aki un muevo pipino!!! Mi ijo no vino a enkontrarme o resivirme al aeroporto, no estuvo en la sala de resepsion i yo mesmo no tenia la chika moneda para azer una yamada de telefon. Ma me aregli, i kuando telefoni i mi inyeta oyo mi boz, demandando donde estava, me disho ke me estavan asperando el dia siguente. Yo muy kalma solo le dishe:
“Si en Beijing se olvidaron de mi, no me sorprende en absoluto ke aki en kaza tambien vozotros vos olvidatesh de mi!”
Enviado por Rivka ABIRY / Haifa
