Las konsejas de Rivka: SUEGRA, NI DE BARRO BUENA

Por Rivka Abiry

Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene okostmbrados.

SUEGRA, NI DE BARRO BUENO

Konosen a mi suegra ?. Keren verla ? Keren ke vo la prezente?

Buyrun. En unas kuantas palavras, es un egzemplo spektakoloso i uniko..

Kuando me avisan ke va venir a mi kaza, me se suven los fumos al meoyo, i me suve la sangre a la kavesa. . Me hui ande el doktor: me disho que tengo alergia.

Buen pepino – alergia……., me viene una migreña, ke me muero.

Mi suegra, aparese ande mozotros solo dos vezes en el anyo, i esto es bol bol yetishir. El kilimiko kolorado ya lo mete mi Josefiko, mi marido, delantre de la puerta, dos semanas antes ke venga . Para mi este kilimiko es komo la mantiya ke meten los toreadores i matadores delantre de los ojos del toro.

Ay, ay, la migreña empezó.

Pishin después ke viene, kita lo que kita de su chanta de komadre, sale enmedyo un tefteriko blanko. Este tefteriko, es una ensiklopedya.

Ay todos los números de telefones: de la tante Rosita, de Djoya, de Regina de Esterika, de Fortune, del tio Mordo, de Joseph, Nissim, León, de los sovrinos ke biven en Israel ,y estos del México, de Miami, de la Fransya, de Italia, de la Bulgaria . Ay tambien números del peshkadero, del dondurmadji, del zarzavatchi, del kunduradji, del djamdji, del postadji y del bakal.

Non faltan los números de teléfon de 10 taksis, 5 doktores, 3 ospitales, 2 enfirmyeras, 2 banyos turkos, una ajensya de vapores i 2 de shemen de fer. Ay ay…., me olvidi en este tefteriko, ay i días de kazamyento, de aniversaryos i los lugares de simeteryos i tambien de la tombas de los muertos de la famiya, ma no ay un teléfon de una banka……- deke? Eya troka las bankas, komo troka las kamisas. Se espanta ke la van a rovar. Le parese que las bankas son dalaveradjis. Pensach ke tiene paras? Solo una lokura. Unos kuantos pedasos de oro i un poko de papelambre en una bolsika vieja. Esto es todo su kapital.

Me demandaj si yo estó en su tefteriko. Ya…ama no normal – solo la letra A (me yamo Agnes) i estó en letra grande kolorada, su kolor preferida. So su favorita ?????.

Viene en mi kaza, i se mete a gizar. Emprimero kita todos los tendjeres i kapakitos del dulap, los lava, los alimpia, los frega kon limón, aze de un fondo preto karvon un espejo. Los aze todos parlak i los arrésenta i asorta del chico al grande, los enkanta todos, i eyos emblankesidos i limpios en su formasyon la oyen i baylan al akompanyamyento de su kanto flegmático a la turka. Los mete uno sovre el otro (lo yama“au bain marie”), uno detrás de otro, uno kon agua yelada, uno kon vino blanko, komo el maestro de un orkestra.

Solo avres el kapakito, te sale un aroma plaziente, ke te shasherea i una golor ke te enkanta. La golor se suve fina la nariz i te araska el paladar… Miras ariento en el tendjere, ves la kolor de la sustansya, o de las albondigitas kon berenjena. La grandura de las albondigitas son del mesmo kalup, uno komo el otro, i tienes el “embarras du choix” no saves kualo dizir i ande empesar a gostar.

Vengo a la kaza a las 2 de la tadre , no ay tiempo para diskusiones.

Mos aze a todos lavar las manos i mos aresanta a la mesa. En el sentro de la mesa sovre un mantel limpio un buketiko de rosas, i sovre el buketiko una kartita enkolgada kon el menú, que eya escrivyo kon en el ordenador.

En kada dedo tiene un marafet.

Komo los tendjeres, ansina mos dirija a toda la famiya. Mos aze baylar komo lonsos del sirko. ……. Ama todos se chupan los dedos i la keren. No me puedo keshar.

Para deshar la savor buena en la boka i para eskapar esta konseja, rogo al Dyo de dar a mi suegra de alkansar una vejes buena i a mi de darme pasensya i tomarlo todo kon anchura.

Rivka ABIRY / Haifa