eSefarad Noticias del Mundo Sefaradi
Por Rivka Abiry
Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.
Ora de aldikera
Kuando el amaneser se amostro komo un día asoleado i ermozo de primavera a la estasion de treno de Barcelona i kuando oyimos el chuflete del maestro de la estasion i el pesgado sonido de la serradura de las puertas, mos dimos kuento ke estavamos asentados en un kompartimiento del treno. Despues de salir del aeroporto de Barcelona i prontos de partir a Leon, muestro buto fue de partisipar ayi a un enkontro de famiya. Eskojimos el mas plaziente kamino, pasando Llieda, Zaragossa, i Burgos, para alkansar a Leon, ke se topa al noreste de Espanya. Leon es una sivdad ke vale vijitar, ke tiene mucha istoria i es la ultima sivdad para arrivar al Kamino de Santiago.
Por ke kavso eskojimos Leon para arekojermos toda la famiya? La okazion era la fiesta de Bar Mitsva de Jaffe, ke nasio en esta sivdad i se engradesio ayi.
Jaffe, el bisinyeto de mi ermano avia embiado una yamada a todos de muestra famiya para vinir a fiestar su Bar Mitsva. Tambien para ermozear la fiesta, la ija de mi ermano, ke bive en Madrid organizo el akontesimiento, topo un buen otel, un servisio de komidas, kombido la prezensia de un rabino i un trio de kantadores. Los miembros de muestra famiya devian venir de Londra, Suisa, Nikosia i mosotros de Israel. El otel se yamava «Parador de Leon» ke es situado en la plaza de San Marko.
Kuando i komo ampeso para mosotros la idea de reuniones de famiya?
Durante los sinko anyos pasados, mi ermano i yo entendimos la valor de un arvole jenealojiko, izimos esforsos de topar i aparejar el muestro, i empesar kon la búshkita de su dokumentasión. Ansi reushimos a enkontrar parientes i serkanos por todo el mundo, i mesmo deskonosidos ke no supimos fina agora de sus egzistensya i ke apartienen a muestra famiya. Entre los miembros de muestra famiya, de la parte de mi padre, topimos munchos pintadores, ansi komo de parte de mi madre salieron en medio personas ke savian kontar konsejas. Kon el ayudo i muestras bushkitas intensivas, kualkar kon el Internet, la posta, lakerdis de teléfono i aserkamientos persona kon persona, mos se enrikesio la famiya. Ansi alkansimos a enrejistrar 1500 miembros, ampesando kon los SALTI’s desde 1600, i editar todo esto en un livro. Ke lavoro! Estuvimos orgoliozos de muestro lavoro. Por siguro, una vez ke supimos ande biven muestros miembros de famiya, teníamos el plazer de viajar a Londra, a París, a Nice, Estambol i a Bulgaria para toparmos personalmente kon eyos. Pero para ekonomizar los gastes, mi ermano desido de no akompanyarme siempe, ma de embiarme azer en sierto kavzos los viajes, solika. Ma ansi el aserkamiento personal tambien mos ayudo.
Apunto de arepozarmos despues de la imprimeria de muestro arvole de famiya i de gozar de los esforsos, ke eran enkoronados kon reushita, mos apanyimos kon koraje a un otro semejante sujeto, la de la bushkita de la egzistensia de un «kuento numerado, o «kuento inaktivo» en los kuentos bankarios suises, ke en o serka de 1990 aparesio, salio en medio, i fue publikado en los periódikos lokales.
Indemas mi ermano tenia algunos rensenyamientos i provas ke mi padre, mientres ke residia en la Suisa, avia avierto ayi un «kuento numerado», ke fue egzaktamente komo kualkar otro tipo de kuento. Para este segundo projekto se nesesitava de inchir un monton de formalidades, eskrivir letras, presentar sertifikados, i fotos. Los pasos menesterozos para entrar en la lista de demandantes ande las autoridades en Suisa o New York no eran fasil, i de mesmo de presentar ultima prova ke mi padre posedava un kuento «inaktivo», mos tomo muchos anyos. Entremientres lavorando sovre el arvole de famiya, mos ambezimos mucho i esto mos dio la esperansa, el poder de aserkarmos a este projekto, i de konfontrar muevos empedimientos.
Malorozamente muestra korrespondensia kon todas las autoridades relevantes suisas se terminó kon un rechazamiento ke no reushimos a apuntar lo mas importante – el numero del kuento. Todas muestras búshkitas empesando kon letras, fotos, kuadros, tabletas o albumes, fueron batal. Regretimos de no tener mazal, de no topar lo ke era nesesario, i ansi de mesmo resivimos kortadas, dezechados i anulamientos de muestra reklamasion.
Retornaremos agora a la fiesta de la Bar Mitsva de muestros miembros de famiya. La fin devia ser un pranso, una alegria para los korasones de todas las djentes, ke vinieron para gozar de esta reunion. Los aparejos reusheron, todos se asentaron a lado de grandes mezas, tuvimos el plazer de vermos, de alegrar muestros korasones, de kontentarmos de la bienkerensia, de admirar los diversos vestidos de las mujeres, i las diversas maneras de onorar el “baal a simha”, komo finalmente de chuparmos los dedos de las delisiozas komidas i alimentos aresentados en platos en el bufé.
Finalmente Jaffe vino a la terasa para azer su diskorso. Él yevava un pantalon preto, una kamiza blanka, sapatos de laka. Lo vistieron kon gusto para esta okazion. Pero la koza la más notable de su vestimienta era la kadena de oro ke akolgava de la aldikera de su pantalon. Kuando vide esto me se tomo el suluk. Me akodri de las viejas oras ke se uzavan durante los primeros anyos del siglo dalkavo i ke de mesmo mi padre tenia.
Avlando de oras, no kale olvidar ke en el sentenario de antes se uzavan oras de aldikera, enkolgando de una kadena de oro. No fueron uzados komo un kolié. Eran kostozos i los ke los uzaron, apartenian a la alta sosiedad. Tener una ora de aldikera signifikava entonses el estado, la abundansia i la enerjía de su patron. Djoyas i diamantes tambien empesaron a ser utilizadas para estas oras, de asi ke se enkaresieron. Esto tiró el presio de eyos para arriva i otra vez dio a la ora la enerjía de demostrar su valor i estando «Moda». Algunos tenían ariento de la kuvierta figurinas o símbolos espesiales. También yevavan una línea o dos ke solamente el patron o el resipiente konosiya. Mi padre utilizó la ora de aldikera komo regalo. Yevava su nombre, sus inisiales i un numero.
A punto después de su diskorso me aserki de Jaffe i le rogi dé amostrarme la ora. Ké sorpreza! Era realmente la ora de aldikera de mi padre ke agora komo erensia pasó a su bis-bis inyeto. Me akodri de la dicha de mi padre:
“Devesh saver ke el tiempo no se areta, ainda kuando no seria kon vosotros »
Kuando el avrio la kuvierta de la ora, vide ariente las fotos de mis padres, la inskritura de las inisiales i al lado de las letras J. P., un número de seria komplikado al derredor de eyos. Me se tomo el tino. Fue una koza ke yo nunka podia imajinarme ke iva akonteser.
Di grasias a mi maraviyozo padre ke metio ansina el plazer de despartir su erensia a todas las sinko jenerasiones de J.P. de muestra famiya komo tal.
Tambien de esta testreada entendi ke todo ke bushkimos kon anyos estava en frente de muestra nariz. Aki topi el numero ke tuvimos menester komo dokumento i ke mos faltava para muestra demanda.
Ke jenerosa vista tuvites, papa, ke manera te vino en tino de pasar tu erensia ansina i dar gana a tus inyetos i inyetas de kontinuar o eskapar sus estudios.
Kol Hakavod, padre mio maraviyozo!
Rivka ABIRY / Haifa
Publikado en El Amaneser
