eSefarad Noticias del Mundo Sefaradi
Por Rivka Abiry
Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.
Los guevos
Muestra kasa se topava kashki en el sentro, ande las kayes de la periferia se davan randevu. Esto fue mi mazal pormodo ke mis amigas de la klassa, en pasando kada dia mi kasa, sonavan a la puerta i mosostros mos ivamos enjuntos a la eskola. Ansi formando un grupo entravamos en la gimnasia. Entre las amigas avia Florika (una djudia), su prima Bella i una Bulgara ke bivia alado de la “Asparuhova Kula”.
Ansi konosi la tiya Beya, la tiya de Florika. Deke Florika bivia kon su tiya i no kon su madre no me fue klaro, antes i fina agora. Supe ke esta tiya savia kontar kon muncha dulzura i grasia kuentos. Yo asemejava esta tiya a una guerta, kon flores eksotikos, kon estatuas de mármol, kon puertas seradas, kalejikas tuertos, kurtos i ermosas. Demesmo tiya Beya mos savoreava sus kuentos en avlando de su nona, ke bivio en la Rusia en lavorando komo mosa ande una aristrokata en Saint-Petersburg. Ke me alegrava de oyir de estas kuentos, eran los pasajes de la vida de su nona, de la amistad entre la dama rika i aristokrata antes de la Revolusion Rusa, i la mosa djudia. Avia una romantika, una deskripsyon dulse, un raporto raro, sin formalidad, muy ermoso i interesante entre estos dos, ke yo no me kansava a oyir. Tiya Beya entre otro, mos avlava de los regalos chikos de sedef ke resivia de esta “dama”. Eya siempre la alavava i nombrava “La dama” i kon solo una palavra me dava a mi una idea inolvidavle de esta rika i kerida persona.
Florika, de otra vanda nunkua no dava atensiyon a los kuentos de su tiya, los tomava liviano, disia ke su tiya tiene tendensya a imaginar o azukarar kosas del pasado.
Un dia kuando Florika partio kon un grupo a Barcelona, tuve un teléfono de la tiya Beya, rogando me de venir a tomarla al ospital, pormodo ke se kayo i pensa ke se rompio el pye. En el ospital, yo la akompani del primer momento, la tomi ande el mediko, vide komo le izieron el bandage, la merki la melizina, la yevi despues a komer, i kuando me arogo de yevar la atras en kasa, no refusi. En kasa, le apronti la kama, i a este momento kon una voz muy emosionada, me rogo de avrir al armario, i de kitar de un bogo un kuti de fiero. Antes de avrir el kuti, me izo prometer ke no vo deskuvrir o avlar al delguno de este kuti, ke es su sekreto, i el sektreto suo profundo. En avriendo el kuti, kon manos tremblandos, vide 4 guevos. Tres boyadados en kolores diferentes, komo los christianos usan para La Paska sua, i un guevo muy pesgado, kon dantela de oro i plata, kon pinturas endyamantodos, enkuadrados en email, en otros palavras una ovra de arte, ke nunkuna vide fina agora. Una maraviya.!!! El ermoso mavi guevo fue enserado muy pinti en una mantika spesial. Eya no me lo decho tokar, ma me konto ke ninguna persona no save ke eya lo tiene, i ke lo resivio komo erensia de la “dama”, su patrona, Yo me anamori de esto guevo, fue enkantada i me akodro fina oy de su fineza i valor i supe apresiar el meresimyento de tiya Beya.
Kuanto tiya Beya murio, oyimos ke decho una erensia de un million de Shekel a Florika.
Me demando – fue este guevo unos de los renomados guevos Faberge ke reusheron a estar eskondidos , ke salyoendo de la Rusia, la tiya Beya resivo de su proprietera, . No me kontaron komo Florika resivio la eransia, ma yo penso ke el “Savoir Vivre” ke la “dama” ensensyo a la tiya Beya i ke paso despues a Florika, valia mas.
Rivka ABIRY / Haifa
