eSefarad Noticias del Mundo Sefaradi
LEVKOV
Kuando las puertas del Estado de Israel se avrieron, una onda de djudios trusho 48,000 imigrantes de la Bulgaria a Israel. Este égzodo era enorme i akontensio después de la Segunda Guerra Mundial, kuando los komunistos en Bulgaria tomaron el kontrol del governo Bulgaro. Miles i miles de judios se dechizaron en un kurto tiempo de salir de sus sivdades , de deshar sus kazas en Bulgaria i venir bivir en Eretz Israel.
Estonses un buen dia, mi papu el Pamukchi kon toda su famiya se dechis de partir a Eretz Israel . La family era grande, kon munchas kreaturas, munchos djenitores. Ma kero kontarles ke en esta grande familia las relasiones entre los dos ermanos, Shmuel i Leon nunka no eran muy fraternal, i a esta ora se azieron peor, por modo ke Shmuel keria partir a Eretz Israel, i Leon komo komunisto grande, ke tenia una pozitión importante i sentral del poder en el partido komunisto en Sofia, no kisho irse endjuntos kon su djenitores. I es ansina ke los dos ermanos se espartieron i non se avlavan uno kon en otro.
Paso tyempo, Samuel salio de la Bulgaria, partio a Eretz Israel, deshando su ermano detrás. Las famiyas enkontraron munchos difikultades en veniendo a Israel i tenyan situasyones i kondisyones duros para akomodarsen. Tambien el Estado de Israel, el rezin nasido estado, ke avia salido de la guerra de la Independensya tuvo kondisiones gravas ekonomikas. Ansi los muevos imigrantes tuvieron de luchar kada dia para topar kazas, para topar lavoro, para tachteriar, apoyar i sostenir sus famiyas i dar se la pena de akomodarse en su patria.
Ma aunke munchos anyos pasaron, la famiya Levy entera no se desho de bushkar kon kandela a Leon, dezeavan a toparlo, a enkontrarse kon el, ma no reusheron. Fue dicho ke Leon avia salido de Sofia, fue a bivir en Rusia i estudiava ayi muzika..
En 1975, Shmuel kaminando un dia entres las kalejas de Tel Aviv, vido un avizo ke atiro su atension anunsiando una orkestra rusa ke devia venir a Tel Aviv. El mejor de este anunsio era la foto i el nombre del artisto i alavado kantador Levkov , ke nasio en la Bulgaria, ke agora bive en Rusia i ke avia estudiado en Moskova Bel Kanto.
No teniendo munchas paras Shmuel merko un bileto barato i a la tadre se fue a la sala de konserto, asperando ke el kantador aparezca
Shmuel devista rekonosio su ermano, aprovecho ke la audensia empeso kon el aplauzo i tuvo el animo de apresurarse en korindo detrás de la shena para buskar a Leon. Por siguro la reunion inesperada era muy grande i muy removiente. Leon no pude akomodarse de vinir vijitar la famiya puesto su orkestro tuvo un orario muy okupado este mismo dia. Malarozamente en este poko de tyempo los dos ermanos no podrian enchikezer o enderechar las diferensias entre eyos i la reunion no les trusho demasiado enjuntos . Tan serka, tan lechos. Desde este enkuentro el kontakto uniko entre eyos estave solamente kon el telefono i kartas postales. De esta manera un diya Leon le eskrivo ke le preposaron de bivir en Berlin, donde topo un lavoro ekselente kon su orkestro. Despues una vez mas avia una kayadez entre los dos, asta en 1989, kuando kayo la muraya, Shmuel reusho a partir a Berlin i de kandrear a su ermano, ke mas no lavorava, i ke bivia soliko, de venir a morar en Israel.
Onde pensash ke se pueden enkontrar en dias estos los dos ermanos???
Estan okupando enjuntos una i la mesma kamarata en un kaza de djiente ke avanzaros en anyos i son ayedados, Shmuel ensenando Tanach i Leon la persona ke organiza las programas de englenear los residentes mayores.
La sangre no se aze agua.
Rivka Abiry
Rivka Abiry partaja kon mozos sus konsejas, Estos kuetizikos son kontados por Rivka kon la grasia ke ya mos tiene akostumbrados.
Fuente: Enviado por Rivka ABIRY / Haifa
