eSefarad Noticias del Mundo Sefaradi
Por Rivka Abiry
Mi inyeta Dorit Abiry eskrivio esto kuento ke yo lo traduzi libre del aleman.
Dorit esta aziendo sus estudios medikales a la Universitad de Berlin.
La konklusion i el konsejo, komo los enkommendansas ke eya mos esta dando a mosotros los ayedados, los desho a vosotros de topar.
LA ESTASYON DEL AUTOBUS
Yo estuve asperando en una estasyon a mi autobus, ma el bus no keria venir. Tuve muncho tiempo para observar una madre kon su ija en un puset de bebe. Eyos atiraron mi atansion, porke eran tan diferentes en sus kolores del griso del asphalt de la kaye. El puset era kuvierta kon una kolcha kolor roza-pempe, la madre de mismo tenia un chapeo kon rozas.
Del bebe apenas se pudo ver su kara, tanto estavo tapada kon su kakuleta i su manton. No supe si se tratava de una ijika o un ijo. Dado ke la madre avia eskoshida la kolor roza-pempe, estimi ke era una ninia, de un anyo i medio o poko mas. Kero atorgar ke no los deshi de mi ojos i ke tuve el sentimiento ke solo la kolor pempe era la atadura entre la madre i la ija. El aspekto jeneral de la madra era ke es una mujer ke tiene el uniko interese en su personalidad. Ademas no avia lugar para un chika kreatura ke nesesitava amor i atension. Ansi vide ke la ninia no tenia menester de entrar en kontakto kon su madre. Ma la madre me dio de mesmo la empression ke era agreada, merikeyada, preokupada, kon ojos mirando sovre las kavesas de la otros personas asperando al bus i mas poko echando ojo a su kreatura.
Del autobus no avia vista. Un ninio de sinko anyos, mal vestido, ke yo avia notado ya ayantes, demonstrava su pasatiempo en saltando, i en koriendo en la kaya entre las djente ke estavan asperando enfrente de la estasyon del autobus, Luego, un objekto atiro su atansion, la ninia en el puset, kolor roza. Siempre me paresio interesante de ver komo ninios toman kontakto unos kon los otros. Las chikas kreatures kompartan sus sentimientos, siempre muy espontaneoso, involuntaryo enfrente de un deskonosido, kon una sonrisa, ke es de vesez dar a entender su alegria, su kuriosidad, es komo un dialogo silensioso kon la persona enfrente de eyos.
La madre se sorprendio de ver subito una sonrisa aklarando la kara de su ijika, una koza ke avia desaparesida ya aze muncho tiempo, i ke la preokupava. Ansi pensando ke su ija estava sufriendo de una hazinura, dechizo de yevarla a un mediko, para egzaminarla al fondo. Malgrado ke en este momento vido de muevo su ijka kon una sonrisa, la madre travo el puset, le echo una mirada no muy amistosa al ijiko, i ansi rompio la liason ke avia entre los dos ninios.
En asuviendo me en el autobus echi una ojada a la madre i su ija. Vide ke la pekenia se aktivo, i ke deskuvrio ke en aleventandose en su puset, pudia mirar
afuera, pudia bushkar el joven. Yo ke estava asentada detras de eja,. pude ver sus grandes ojos. Desmazalmente el joven no suvio al autobus, la chika amostro de muevo su kara triste i la madre la molestava kuando se alevantava, i siempre la empujava atras en el puset. La ninia no kisho yakishearse i akuncharse, trato de muevo de aleventarse, para bushkar el ninio. Eya no fue kontra su madre, pero puedeser keria amostrar ke tiene la kapachetad de alevantarse. Yo estuve sigura ke la madre keria darsarla a su ija ,ma la ninia de muevo se atristo, asta ke la madre la tomo en sus brazos.
Tomando todos los dias el mismo autobus para irme al lavoro, pude de muevo topar a los tres i pude ver komo el ninio al otro dia, era todos las vesez atraido por la ninia. Los chikos izieron kontakto kon los ojos, el dialogo kontinuo, el intereso i la amistad kedaron. El resultado fue ke la ninia dio buelta i empeso a riirse. El muchacho estava saltando alrededor del puset, azia djestos diversos kon su kara i manos, soplando sonidos fuertes komo si tuviera una trompeta en la mano, o se arodeyava al deredor del puset, komo si era un avion, Era ermoso de ver komo el deskonosido tratava de animarla. Es ansina ke la ninia sonrio kada vez i despues mesmo supo anunsyar kon gritos ke estava disfrutando de esto. La madre esta vez no lo alesho al chiko, pormodo ke i eya tambien se sorprendo de ver de manera ke su ijika pedrio su tristeza, komo el joven kon su ingenuitad alkanso a achilear i englenearla i de trokarla la kolor de su kara. Era klaro ke la chika era alegre i tresalida en la presente del joven.
Yo tambien estava enteresada i pregunti sovre el ninio ke me plazio i a ke yo, nombri “Vida”. Me kontaron ke es un guerfano, ke mora en barakas, kon su abuela, despues ke pedrio a sus padres en un aksidente. Mientres tanto, el komporto de la madre kambio verso el ijiko, i un dia kisho yevarlo kon en el autobus. Ma el chiko amonstrando sus aldikeras vasias, le dio a entender ke el no tenia paras. Ma eya lo yevo a su kasa, ande le dio a komer, le izo un banio, i le meto vestidos limpios.
Pasa punto, pasa mundo. La madre, no tuvo duvda, ke el chiko kon su buena alma ke tenia por aryento, era la kavza ke su ijika no amostrava mas tristesa, se troko, se rebivio, i vino en si. Tambien estava sigura ke el ninio kon su dulsura, su simplisita, le dio a entender a la madre, ke de los chikos se ambezan siertas verdades. Al kavo lo aprofeshio i lo izo parte de la familia
Notisia de la abuela de Dorit Abiry- Rivka Abiry: Ansi el ninio topo una mueva familiya i fiesto djuntos kon eyos para la primera vez el alumbrar de las kandelas de Hanuka- ke es el siman de la maravilla de Hanuka
Rivka Abiry
