eSefarad Noticias del Mundo Sefaradi
Por Rivka Abiry
Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.
El sombrero de borselino
Kero kontarvos una konseja no tanto sovre el chapeo borselino, pero sovre el ombre ke lo vestiva. Ma desirvos la verdad, deseo eskrivir sovre él, no porke el me gustava, pero en el kontrario porke el tenia i una otra kara.
Kuando yegimo en la Bulgaria, mi familia bivio en una de las sivdades situadas a la Mar Preta, en una sivdad ande avia una keila djudia. El presidente de esta komunidad djudia era Yakov Uriel. .
La komunidad djudía era algo chika, tenía dos kales, i una kasa en el sentro de la sivdad yamada la “Evreiska Objina”, (la munisipalita, el belediye Djudio). En esta kaza también avia una sala magnífika para las reuniones de los miembros i sus fiestias. Este edefisio se yamava el Beith Haam, el sentro espiritual i kultural de la komunidad djudía donde se topava la organization de Milut Hasidim, Malbish Arumim, Hevre Hadisha ,i del WIZO. Todo esto en las manos i dirishado de Sr. Uriel ke savia yevar los echos i lo negosyos kon grande semplezitat i kapachita. Ansi ke le dieron el nombre “ el lider “.
Kale adjustar ke el Sr. Uriel , un hombre alto de boy i henoso, siempre vestido a “katrepengle” , yevava un sombrero gris de borselino, ke le yakiheava. Este “lider” impresionava la djente kon su manera de kaminar, de avlar klaro, de tratar onesto problemas difisilas i de tomarlos kon kolaylik. Era el patron de la keila, Tenia una personalidad i popularitat plaziente ke atirava a la djente. El fue konosido por su grande ayuda, su suporto, renomado por su honores i sus aktivitades. Sus palavras honestas fueron apresyadas de la djente, el era amado i kon anyos eskoshido komo presidente
Ma el tenia i una otra kara. El momento ke él estava en presensia de niños, él travava las kolas de los kaveyos de las ijikas, o kon un solo movimiento de un dedo alevantava los chapeos de los ijikos i les dava una takla i saltavan en el aire. Tenia segun mi, un aire de arrogansia en sus manieras i yo un poko me espantava de el. No me agradava, me desplazia.
Estuvo esto la razon unika de una muchacha de evitarlo? Deshame kontinuar.
Él apartenia a los amigos de mi padres i venia vijitar mos en muestra kasa. Kuando él venia ande mosotros, los musafires se asentavan todos en la sala de komer, donde una chiminea, fraguada en la pared, enrekesida kon lashas kolorados, trayiva un gusto aparte i una ermozura a esta sala moderna. Kuando saviamos ke Sr.Uriel va venire, mi ermaniko i yo, mos ivamos en la guerta arekosher aviyanas sekas i las echavamos en eskondidas , sin ke mos ven, en las flamas de la lenya kemanda de la chiminea. Las aviyanas se patladavan de la alta kayentura i saltavan kon un ruido espesial, una dubarina i atorvavan los musafires, espesialmente Sr. Uriel, ke afilu una vez tremblando, salto de su siya, se tapo las oreshas i se fuyo de la kamareta. Esto fue el modo muestro, el pagamiento por sus burlas i shakas ke mos azia en la eskuela.
Pasa tiempo, pasa punto. De chikez entri en mi mansevez, ma el Sg. Uriel dainda el patron de la keila i demas eskojido komo el presidente del KKL. Todos savemos kualo es el kuti blu i komo se usavan en la Diaspora las kojetas para sembrar boskes, emplantar parkos, aprontar la agrikultura i konstruir reservoires de agua para Eretz Israel.
El kontenuto de los kutis blu, se arekoshiva kada viernes. En la Dispora, mosotros, embiados i organizados por Sr. Uriel, aziamos la kojeta en entrando de ofisina a ofisinas de los merkaderos djudíos. Los grupos juvenilos ke se okupavan kon las kojetas, en muestra sividad eran Makkabi, Betar o Hashomer Hazair. Yo me areselava de ir me al buro de Sr Uriel, ande el endjuntos kon su kontador se metian a kontar la chika moneda i aser heshbon. Siempre engrato de los Makkabim, ke se davan tanta pena, el supia a alavar solo a los Betarim. Yo no supe komo englutir este bokado amargo i sus remarkas me davan dolor de tripa, No supe si es una de sus shakas. Deke por esto me se solevantavan los fumus a mi kaveza???. Puede ser
ke el kerya alkansar un otro buto, kerya aprovechar se de un otro sebeb.??? Ma no tuve el koraje de averiguar. Ama deke no pude suportar lo??. Es ke el beyefendi tenia una otro kara ke no konosivamos????
Entremientes en 1937, kon este sequinte evenimento, pusho mi antipatia por el. A esto tiempo el governo bulgaro merko el vapor “Shipka” i lo estrenaron un alhad. A la seremonia estuvieron kombidados muchos notables de la sivdad, entre eyos el mas grande ofisier de la marina Bulgara, el representante de la keila djudia, el presidente del konsistorium i del Beit Haam, lo papazes, i mi papa, ke lavorava komo eksportator de sereales.
El Sr Uiel, ke nunka aparesia kon su esposa en publiko, le plazia bever, i mirava kon alegria a la profondura de su kupa. Dizia ke el raki arrebive al peshe. Ansi el se echo a las komidas sovre la meza del banket i la bivienda en emborachando se bueno en saliendo del vapor. Mosotros, ke lo akompaniaron, vimos negras i no buenas, lo tomimos en su kasa, i lo echimos sovre su kama. Entremientas fue tarde de la noche, ma vimos en la kamareta una kampania akolgada de la pared. Afilo boracho mos disho: “Es mi ora Sviserana djusta”, una ora ke siempre el se alevava i fue orgolyozo. El tomo un baston i empeso a chafteyar la. El ruido de la bastonada fue terible, ma los gritos muestros fueron mas flakos de su visino ke morava ariva de el i ke grito:
“ Boracho maldito, saves ke agora es despues de media noche i ke la ora es 3 i 12 puntos.” Todo esta fue demazya para mi.
Olmak da var, todo esto troko, fue olvidado kuando yo vine a Israel onde topi la amor de mi vida. El mansevo ke yo me anamori fue el sovrino del Sr. Uriel, ke no tenia kreaturas i kon su esposa la tante Duda me tratavan komo ke si fuera su ija i ansi entri en su parientes. Afilo ,en la absensyia de mi padre, a la ora buena de mi kazamiento, es Sr.Uriel ke me konduzio a la hupa. Imaginavos ke por la boda Sr. Uriel estreno un chapeo borselino muevo, esta vez kolor maron.
Despues ke mos desharon la buena vida, me desharon una erensia, unos kuantos dukados, ke tengo fina oy. En ganeden ke esten.
Enviado por Rivka ABIRY / Haifa
Puvlikado en El AMANESER
