eSefarad Noticias del Mundo Sefaradi
Por Rivka Abiry
Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.
EL PARLIAMENTO
Mas suerte ke sehel
Keriendo aprovecharme de los ultimos dias de mi vijita en una de las ermozas kapitalas de Evropa, pensi a vijitar su Parlamento i sus kompartimientos interiores, las fotografias de kualas yo avia visto en diferentes livrikos publikados por los turistos.
Era un día asoleado. Segun el plano de esta sivdad ke tenia en mi mano, yo me topava a la Ringstrasse i kije alkansar el Parlamento. Puedía esto ser el kamino? De mesmo otras kozas me vinieron en el tino. Kualas son las oras de la aviertura o la serradura para las vijitas, kuando i a ke oras ay vijitas dirijados? Sakudí mi kavesa. Inkreivle. Seguro, arivi al lugar djusto, kuando delante de mí vide en la altura, la atraksion turístika notabla, la figura enorme de la diosa grega de la saviduría, Athena, ke era soportada de un pilar, vestida en armadura kon una espada en su mano siedra i ke yevava en su mano derecha la diosa grega de la viktoria, Nike. Enfrente de eya estavan echadas kuatro figuras, las reprezentasiones de los ríos konosidos de este país, el Danubio, el Inn, la Elbe i la Vitava.
Sí…, era justo el lugar ke estuve bushkando. Era el Parlamento. En la leshura vide una puerta avierta. En aserkandome, me meti a ver adientro. Entonses vide un grande grupo de djente, avlando i asperando. Segun sus vestimientas, todos apartenian a un grupo turistiko de una sierta parte de la Austria, puede ser del Tirol o mas leshos de la Italia. Todos de grande boy. Pero kómo puedría yo, ke so bashitika, mesklarme kon este grupo? De mesmo averguensada miri a mi vestido, mi fostan pasado de moda. Sin dubio yo era al pareser una estranjera ke seria difisil de mesklarme kon estos turistos. Al mesmo tiempo keria entrar i echi una rapida mirada a mi ora. Vide ke el tiempo estava aserkandose de 12 de medio dia, el ultimo tur kon una giya. Devia entrar o salir. Kuando tomi la desizion de azer la buelta i de irme, oyi las palavras de la gia turístika, ke grito:
» Venivos adientro, estamos a punto de serrar las puertas, ke agora empesamos el tur de alkavo para este dia.»
Kon un poko de «huzpa» me topi delante de una senyora, ke estava dando unas otras instruksiones i mos izo kaminar mas rapidamente. Ni eya ni los otros observaron ke yo estuve «vestida otramente», por kavsa ke se oyiya solo su yelada boz ke ordonava:
«Por favor, vos rogo de apresurarvos, arekojervos, muestro grupo esta kompleto.»
No puedía kreer lo ke oyi. Me tomo sikinti i despues kon una sonriza kaji keria gritar de alegría.
» Sí, por siguro. Asperame, ya esto viniendo .»
Dando un buelta, vide alora el grupo kaminando detras de la dama kon la bandera, ma en el mesmo tiempo oyí la echada de mi boz:
«No sos parte de esto grupo, komo puedes eksplikar tu prezensia?»
Mientras ke la dama estava avlando, kontandomos la istoria del Parlamento i pasando de la entrada, a la sala i a las otras kamaretas, entendi ke entri grasias de este grupo a un tur algo edukativo. Yo aboltando las pajinas de mi livriko, supe djusto lo ke la manseva me amostro, la entrada prinsipal del pórtiko ke es una kopia egzakta de la puerta en el Akropolis de Atena. Después pasimos el vestíbulo del edifisio i mos impresionimos del espasio de las paredes, kon los lugares adornados de las estatuas de dioses gregos, echos de mármol de Carrara. Mos yevaron a través del Pasillo magnífiko de pilares i después entrimos en la Kaza de la Resepsión, la Kámara de Reprezentantes anterior ke se baza en un teatro del grego klásiko. La manseva kon la bandera se aboltava de vez en kuando para rekojer a su grupo, ekplikando todo el tiempo la istoria del edifisio, yevándomos a través de los varios kuartos i amostrándomos la ermozura de este edifisio famozo. Entrimos en las varias galerías, i después mos asentimos en bankos en el segundo nivel, ke es para el públiko en jeneral. Kaji griti de alegría. Mirando atras, vide ke el grupo entero la segía, ma yo dando i tomando demandandome:
«Yo no apartengo a eyos, kómo vo eksplikar mi prezensia? «.
A la fin de la vijita la senyora alevanto su baston kon la bandera, mos trusho a una eskalera i kon una sonriza mos demandó de asperar i entonses mos ordeno de entrar en un komedor grande.
Algunos minutos después ke avrieron la puerta, yo me vide asentada alderedor de las mezas, kada una de 20 personas, donde estavan aresentados los primeros aperitivos delante de mozotros. Me asenti en el ekstremo lado de la grande meza, pero aziendo djusto komo las otras djentes, estirando mi mano a las beviendas yeladas, ke despues de tanto kaminar i en un dia kayente, tuvimos todos set. No me atriví a entrar en una konversasión kon mis vizinos, ke estavan okupados konsumiendo i aprovando los bokadikos aresentados delante de mozotros. También eyos tenian menester de arefreskarsen i meter en sus bokas algunas kozikas savrozas. De todo modo me se izo klaro ke en el program del tur dirijado avia areglado una sierta ora de repozo i komo un chiko regalo, un menu kompleto en el restorante del Parlamento. Después ke la komida prinsipal fue servida, vino el tiempo de las tortas i el kafé. Entonses, la giya paso de meza a meza demandomos si estuvimos kontentes de la komida i disho:
«Puedesh agora rengrasiar al kozinero i gozar sus manjares «.
Devo konfesar ke me meskli kon este grupo, gozi del tiempo de repozo, i me plazio la komida, ma pensi ke era karar i demaziado «huzpa» de tomar agora i el kafe i komer las tortas.
Alora sinti mi boz interiora:
«De onde para onde entrates en este grupo. Ayde ya abasta, no egzajeres, bastante te aprovechates de tu shaka. No te yakishea!. Agora fuyte, no te agas rizil!.»
Tomi una chika serviyeta de papel, enburují las dos tartas, salí kayadika afuera del restorante, i kaji empesi a korer despues de serrar la puerta de la salida. Dezirvos la verdad, yo avía gozado mas ke prime de este karishiklik. Korri kon pies deskalsos asta ke alkansi El Munisipio donde asentáda sovre un banko en el parko, ferah, ferah, komí mis tortas i me di kuento ke la vijita del Parlamento valio la pena, ke oy yo fui mazaloza, ke fue un dia maraviyozo en un país estranjero, en medio de un grupo de deskonosidos.
Tenía realmente más suerte ke sehel
Rivka ABIRY / Haifa
Publikado en El Amaneser
