eSefarad Noticias del Mundo Sefaradi
Por Rivka Abiry
El Chapeyo
Para fiestar su “Bar Mitzva” yevi un enverano a mi nyeto a un viaje a la Norvegia.
Ansi arivimos a Bergen, para mosotros la sivdad la mas lecha de muestro viaje. Tenyamos un dia libre i mos dezisimos de suvirmos al finikular del Monte Floyen, de ver el puerto interno de Vagan i el merkado de pishkados avierto. Despues entrimos en un kafe para deskansarmos.
Kuando era la ora de irmos atras, vimos ke el tyempo empeso a trokar, ke un viento fuerte empeso a chuflar, las nuves oskures taparon el sielo, i kashke empeso a azer frio. Para la djente ke biven en esta sivdad esto es sierto normal, ma no para mostros, aldimas ke mi nyeto se olvido el chapeyo en el hotel.
Kerimos tomar un taxi i de rekoshermos lo mas presto possible en el hotel. Afilu apronti la moneda (kronas) en mi mano. En asperando al taxi, la luvia empeso. Un viejo ombre, un chilibi se aserko de mosotros. El me demando un hatir. En payizes ajenos yo no me meto a avlar kon ombres estranos, ma el avlo de una manera tan arefinada ke lo eskuchi. Me disho ke el se avia olvidado su bolsa i me proposo de darmos el chapyeo suo i al lugar de resivir de mi las monedas ke apronti, el pagamiento por el taxi. El demesmo ekspliko ke el chapyeo es kaji muevo, de kuero bueno i bastante de karo. Kon muncho hen kito su chapyeo i lo metio sovre la kaveza de mi nyeto, para aprovarlo. Kavio justo.!!! Tambien me disho ke sus piernas son flakas i ke deve tomar presto un taxi.
Yo no tuve duda, mesmo me pense: “Komo de plaziente son las djentes aki”, ma mi nyeto penso ke mosotros mos estamos aprovechando del viejo ombre. Yo mesmo kije darle paras por el taxi, ma el insisto de trokar kontra el chapeyo. Adjeti, el trato se izo, i kada uno era feliz.
Dainda eksplikando orgolyozamente a mi nyeto la importanzya korektamente de djuzgar la djente, el vido ke el viejo ombre se apresuryo i empeso a korer.
“El no parese muy kansado a mi” me asiguro. A mi no me plazio esta disha. “Aki ay una kosa alga”. Mos dezisimos a seguirlo para diskuvrir.
Mos echimos destras de el, kuando el empeso a korer las kayes enluvadas. Alkansimos en frente de un pub i vimos de la ventana, komo el viejo ombre se enkomendo una bevienda, ke me aparesio komo vodka. “Esto es una bevienda muy kara” disho mi nyeto.” Le va kostar muy saladiko, le va kostar un chapeo moderno.” Saviendo ke el mismo dya, uno de muestros amigos se merko un chapeyo semejante, supimos kuanto vale. Mirimos komo el viejo ombre metio la kupa kon la bivienda a sus lavios i la vasyo en un sorvo. Despues de pagar kon las paras ke le di, antes de tomarse su gabardine, izo un dolash en el pub . En saliendo echo una mirada a la garderoba, apanyo de ayi sin frio sin kalor un chapeyo ermoso i salto afuera.
“Esto es su djugo”. Despues vimos ke el dalaveradji de muevo volvio a la kaye prinsipala, enganyando un otro adjami kon su boka dulse en aziendo la trampa kon sus chapeyos rovados i eskonderse atras de esto en una otra kaye.
“El podria azer esto toda la noche”, disho mi nyeto.
“Siguro”, me lo yevates de la boka “, le dishe, “ma entonses el deve rogar por dias ventosos i fortunosos.”
