eSefarad Noticias del Mundo Sefaradi
Una Ratona de Sivdad una vez se fue a vijitar a su prima ke morava en el kampo. Para komer, la Ratona de Kampo servió kanyas de arena, raizes i kastanyas, kon un poko de agua yelada a bever.
La Ratona de Sivdad komía poko i avagar, gostando un poko de esto i un poko de esto, de manera ke se veía muy klaro ke solo komía para no ofender.
Después de komer, las dos primas izieron un sohbet largo, ama más bien la Ratona de Sivdad avló muncho de su vida en la sivdad mientres la Ratona de Kampo la sintió kon atansión i intereso.
Después se echaron a durmir en el nido en los arbustos i durmieron kon trankilidad asta la demanyana. En sus ensuenyos La Ratona de Kampo se sonyó ke era una Ratona de Sivdad, kon todos los luksos i todo lo bueno de la vida de sivdad ke su prima le avía kontado.
Ansina, al día, kuando la Ratona de Sivdad le demandó a su prima ke le akompanyara a la sivdad, la Ratona de Kampo le disho ke sí.
Kuando arivaron al palasiko en ke morava la Ratona de Sivdad, toparon en la meza del salón lo ke kedó de un buen pranso. Avía karnes i mermeladas, pasteles, kezos i, de verdad las komidas más savrozas ke se puede imajinar una ratona. Ama, apunto ke la Ratona de Kampo estava por gostar un poko de pastel, oyó a un Gato mauyar en boz alta i arraskar en la puerta del salón.
Kon un grande espanto las Ratonas dieron la fuida a un lugar para eskondersen, ande kedaron en kayadez, kaje sin respirar, para ke no se deskuvieran. Kuando a la fin salieron i aboltaron a la meza del pranso, ensupitó se avrió la puerta i entraron los mosos para rekojer la meza, seguidos por el Perro de la kaza.
La Ratona de Kampo se aretó en la kamareta de la Ratona de Sivdad solo unos kuantos puntos para rekojer sus kozas. “Puede ser ke tengas luksos i kozas finas akí ke no tengo yo en el kampo,” disho eya mientres se iva a la puerta, “ama prefero mi komida simple, i mi vida simple en el kampo kon la paz, la trankilidad i la seguridad ke le korresponden.”
Proveza kon seguridad es mijor ke la rikesas kon inseguirdad.
Traduizida por Aaron Shapiro de Washington, DC
Redaktada por Roz Kohen de St. Louis, MO
Fuente: Ladinokomunita
