eSefarad Noticias del Mundo Sefaradi
18.04.2026
Un Ratón mansevo en bushka de aventura estava korriendo por el bodre de un lago ande morava una Rana. La Rana vido al Ratón, nadó aserkándose al bodre del lago i disho: “Te keres meter en la agua i vijitarme? Te prometo ke te vas englenear.”
El Ratón ya estava kandela* porke kería konoser i entender el mundo entero. Ama mezmo ke él savía nadar un poko, no kijo tomar rizko i entrar en el lago sin ayuda.
La Rana tuvo una idea. Eya le ató la pierna del Ratón a la suya kon una yerva fuerte. I ansina saltó en el lago, arrastrando al kompanyero bovo kon sí. Pishín el Ratón se dezvacheó i kería aboltar al bodre; ama la Rana trayidora tenía otra idea. Travó al prove Ratón más ondo en la agua i lo aogó.
Ama antes de ke pudo desatar la yerva ke le avía apegado al Ratón muerto, una Ágila aparesió bolando por enriva del lago. En viendo el kadaver del Ratón flotando en la agua, la Ágila abashó, aferró al Ratón i se fuyó, kon la Rana enkolgada de la pierna. De este modo la Ágila avía apanyado i karne i pishkado para su sena.
Los ke keren azer danyo a otros, munchas vezes se lo dan de sí para sí. (O komo dize muncho mi amigo Saúl, eya kayó en su propia trampa)
*****
* Ya estava muy pronto kon entusiamo o ke tiene munchas ganas de azer alguna koza
*****
Esperamos ke vos ayga plazido!
Todo bueno ke tengash,
Traduizida por
Aaron Shapiro, Washington, DC
Roz Kohen, St. Louis, MO
Fuente: Ladinokomunita
