eSefarad Noticias del Mundo Sefaradi
El pavón, se dize, no se krió kon las plumas ermozas de las kualas tiene tanto orgulyo agora.
Estas plumas ermozas fueron un regalo de un echizero kuando el pavón le rogó kon todo su korasón alguna koza ke lo apartara de los otros pasharós. Después de ke el echizero le fadó el dezeo, i le kresió este plumaje ermozo, kon kolores de emeraldo, oro, violeta i azul, el pavón se fue ande los otros pasharos, paseando para ke eyos vieran su ermozura.
Los otros pasharikos le miravan kon muncho selo. Mezmo el más ermozo de eyos, el sisne, no se podía komparar kon su ermozura.
Pishín el pavón alevantó la kavesa i vido a la ágila bolando alto en las nuves, i le vino una gana de bolar también, komo era su uzo.
Avriendo las alas, kijo bolar ama deskuvrió ke el pezgo de su kola maraviyoza no le deshó alevantarse en el ayre.
En lugar de bolar en el sielo i gozarse de los primeros rayos briyantes del sol kada demanyana, o mezmo la luz rozada de la tadre antes ke se despareska el sol, ya tenía ke kaminar embasho komo si fuera una gayna ordinaria en un kumes (chicken coop).
No sakrifiyeses tu libertad para azer fiakas (showing off).
Fuente: Ladinokomunita
