Las fábulas de Aesop: «El Pastor i las Kavras Salvajes» trezladado por Roz Kohen i Aaron Shapiro

Un día, un Pastor estava kon su revanyo de kavras i en supito empesó una furtuna grande, ansina el Pastor trusho a sus kavras a una meara.

Ayí topó ke avía un grupo de kavras salvajes. El Pastor kería ke estas kavras salvajes se adjuntaran a su revanyo, ansina ke les empesó a dar muncha komida. Ama, a sus propias kavras, les dava solo un poko para ke no se murieran de ambre.

Kuando el aver se aklaresió, i el Pastor kitó a las kavras de la meara, las kavras salvajes dieron la fuida i se desparesyeron kada una a otra parte.

“Ansina me rengrasiash por darvos a komer i tratarvos tan bueno?” se keshó el Pastor.

“No te guluzoneyes ke mos adjuntemos a tu rebanyo,” respondió una de las kavras salvajes. “Ya vimos kómo mos tratarás si es ke apareskan otras salvajes.”

No es buena idea tratar mal a amigos viejos para azer amigos muevos.