Las fábulas de Aesop: El Erizo i Los Ratones trezladada por Roz Cohen i Aaron Shapiro (meldar i sintir)

Un Erizo estava bushkando una kaza buena. A la fin topó una meara chika ande morava una famiya de Ratones. Él les rogó ke partajen su kaza kon él, i muy simpátikos los Ratones achetaron.

Duspués de un tiempo Los Ratones se arrepentieron de averle dado permisión a entrar. Sus espinas puntozas los punchavan kon kada movimiento, i a la fin le rogaron al Erizo ke se fuera.

“Estó muy kontente akí, grasias,” disho el Erizo. “Penso de estarme djusto akí.” I ansina, él los akompanyó a los Ratones a la puerta . I para salvarsen la vida, los Ratones tuvieron de bushkar otra kaza.

Da un dedo i piedre la mano.

Ver todas las Fabulas >>

Fuente: Ladinokomunita