eSefarad Noticias del Mundo Sefaradi
LAS ESTREYAS
de Madeleine de Cacqueray
Kuando éramos chikitikos i muestra madre mos meldava la Torá, mos kontava i otras istoryas kuando le demandávamos kozas ke non teniyan reponsas en el Livriko santo. I mos plaziya muy muncho la de las estreyas.
« Maná », demandava mi ermaniko, en saltando sovre sus piernas: de ké ay estreyas en los syelos ?
La Maná tomava un ayre misteryozo ke mos yevava al payiz de los kuentos, i empesava:
« Al empesijo de todos los tyempos, el Dyó kriyo el Sol i la Luna, i los kazó, del mizmo modo ke izo kon Adám i Hava, i los syelos los espartyeron.
En akeyos tiempos aviya mas luz durante el diya, i para dizir ke una koza estava muy klara se uzava una dicha ke diziya « briyante sol i luna »
Amá pasó tiempo, vino tiempo i la Luna, vyendo ke los ombres i sus mujeres se aziyan viejos, entendyo ke i eya se iva azer fea, i empesó a peynarse i a meterse «aftershave» i losyones sovre la facha.
El Sol no estava kontente de ver a su mujer ansina, eyos eran mansevos i no kaliya ke se merekiyaran por la vejez. Amá estos biervikos no ayegavan a los oyidos de la Luna. Ya no se entendiyan byen los espozados i kada diya i diya uvo pletos i males. Eya era agora muy muncho chidjifyonga [1] i le plaziya muncho okuparse de sí mezma. Su ermozura era grande, mas grande ke el Templo de oro de Shlomo el Rey. Inchida de orguyo, pensava: «So tan ermoza, so presyoza. So komo una perla, una diamante. Se kere ande meterme komo una djoya i desharme ardear siempre.»
El guerko (leshos de mozotros!) ke kere espartir todo lo ke el Dyó aúna, le asopló a la Luna en el burako de la oreja: «Ven en la noche! El Dyó olvidó meter luz en la eskuridad! La solombra será el mijor luguar para un briyante komo tú. Reynarás sin rey, sola kon tu ermozura, serás luz ande n’ay luz».
«A mí me plaze esta ideya», respondyó la Luna, i le disho a su marido: «Kale ke m’arepoze un pokitiko». I deshó de korrer al syelo. Ansina ayegó la noche, i tomó a la Luna en su solombra.
Al empesijo, la Luna estava muy kontente de briyar sola i reynar en los syelos durante la noche. Amá pasó tyempo, vino tyempo i la Luna se enfasyava. No le plaziya mas estar sola, su marido estava leshos, i todos teniyan sar de esta godra sinyora en los syelos. Su kara era blanka komo la perla, i no aziya nada. La Luna estava hazina, i muy triste. No era mas luzya, i se arrepentyó de su briyo. Arogava, gritava, mauyava i durante una noche, se metyo a yorar, a yorar sin fin, ke no keriya estar mas sola. I el Dyó, el Bendicho, la sintyó i se adjideó [2] de eya. No puediya aboltar a lo ke era antes, ma pokito a pokito, los yoros de la Luna se trokaron en kozas briyantes komo perlas, i desde esta noche fueron las estreyas las ke le azen kompanya a la Luna.»
_________________
[1] Ironikamente koketa[2] Apiadó
_________________
Esta es una de las 3 konsejas GANADORAS del KONKURSO DE KOMPOZISION 2024 en la kategoria PRINSIPIANTES.
