eSefarad Noticias del Mundo Sefaradi
Keridos amigos i amigas
En el Jewish News de la pasada semana tenemos el artikolo del Rabbi Dr. Sanford Shadow ke era el rabino de la Flota 6 Americana. Se trata de la voluntad libre delante el Divino
Saludes a todos
——————————————————————————-
LA VOLUNTAD LIBRE DELANTRE EL DIVINO
Tenemos una istoria linda, fuerte i konfuza. Una istoria muy vieja del odio sin razón del Puevlo Djudio, de la parte del enemigo sin piedad ke utiliza toda su fuersa para azer kaer a la Nasión de Yisrael. Este fenómeno se repete a traves toda la istoria djudia. Muestra lektura esta yena de misterio i poezia i nunka supimos lo ke era la perspektiva de los malos i de los éroes.Estamos confuzos.
BALAK, el Rey de Moav tenia la intension de maldezir al Puevlo de Yisrael. Su metodo era simple. Alkilar el Profeta Pagano BILEAM ke tenia un poder malo. Beleam disho al Rey: «Espera aki i te dare la repuesta del Dio». Bileam resive una repuesta negativa i le dize a Balak: «Vate atras a tu pais porke el Dio refuza de desharme ir kon ti». Ke estranyo ke Beleam refuza de irse kon mozotros? En el fin del kuento es un profeta pagano ke veia al Dio. Balak en kontra avia konosido la manera de komportarse delante la aksion umana. I no según la Profesia Biblika. Era uno ke trokava de opinion muy a menudo. Asi penso Bileam ke si mizmo Balak le dava su palasio yeno de oro i de plata, el no puedia azer ni mal ni bueno en violando la palavra del Dio. Iva ser solamente la voluntad del Dio.
Asi Balak rey de Moav demando de Bileam lo ke le disho el Dio. Era una kestión de persepsión. Bileam el pagano veia el Divino en la aksion umana. Balak en kontra veia solamente la voluntad libre en kestiones umanas. Avian dos ekstremos.»La Predeterminasion i La Libertad de Eskojer» El Rabino AKIVA avlo de la tresera pozisión en la MISHNA. «Todo es visto de antes i malgrado esto tenemos la libertad de eskojer». I la Tora mos dize: «Meto delante de ti la vida i buendad, la muerte i maldad. Eskoje la vida». Esto parese a una kontradiksión. Puede ser de verdad los dos? «El Rabino SHIMON DURAN en el Siglo 14 en Espanya eskrivio: «El Dio ve el futuro i no aze mal al ombre» Mismo si es inkomprensible, el Dio entiende al ser umano de otra manera.No ay similitud».
Mos konta la istoria de un ombre kon dos kriaturas. Uno es djusto i savio i el otro es malo. Les mete enfrente un livro i una espada. Se pensa ke uno iva tomar el livro i el otro la espada. El padre no tuvo ke forsarlos a eskojer. Asi es kon el Dio Bendicho ke konose el futuro de la umanidad. El no forsa a ninguno porke kada uno es libre a eskojer. Tenemos ke saver ke es el buto i komportarmos de esta manera. Bileam kisas kijo maldezir a Yisrael komo fue komisionado. Pero Bileam estava en linia kon el Dio. El rezultado fue ke el dezeo del Dio fue de bendezir a Yisrael i no maldezirlo. Ninguno puede trokar la voluntad del Dio en lo ke se trata de muestras vidas. El djudaismo toma siempre el kamino en medio. Todo es visto de antes pero kon la libertad de eskojer.
Trezladado por Shimon Geron.- Sydney
Fuente: Ladinokomunita
