eSefarad Noticias del Mundo Sefaradi
Keridos amigos i amigas
En el Jewish News de esta semana avía un artikulo presentado por «Jackie Brygel» tratando de una Compania Contemporaria de Bailes fondada en Kibbutz «GA’ATON» al Oksidente de la Galilea. Este grupo se prepara a venir a la Australia al fin del mes por la primera ves en 23 anyos.
[Veo ke los Kibbutzim en la Galilea produsen kantantes i bailadores. En mi kibutz avía mucho de esto,entre los miembros viniendo del Sentro de la Evropa.Fue ayi ke oyi komo chiko la músika klásika.La Hora la vide en su entorno autentiko bailando alrededor del fuego a la músika del akordeón.Se organizava Mesibot/Fiestas en el Moadon/la sala.Ayi me ambezi a jugar la armoníka. Era un mundo diferente de lo ke konosía en Turkia]Saludes a todos
——————————————————————————-
LA VIDA DEL KIBBUTZ «Inspirando el Baile»
En 1973 en el «Kibbutz GA’ATON» al Norte de Israel,la bailarina «Yehudit Arnon» fondo uno de los mas konosidos grupos del Baile Moderno, el»KCDC». Lo ke la motivo a azerlo era klaro i muy signifikante. Antes 3 dekadas komo prisoniera de Auschwitz,la jovenika Arnon fue kastigada por los soldados Nazistos por aver refusado de bailar por eyos en tiempo de Noel.Arnon sovrebivio malgrado toda la tortura i el orror inimajinable del Kampo de Konsentrasión i se fue a bivir en Israel en 1948. Se instalo en el Kibbutz GA’ATON al Oksidente de la Galilea. Dediko su vida al Baile asta su muerte en 2013 a la edad de 87 anyos.
En 1996 «Rami Be’er» tomo en mano la direksión,después de aver lavorado komo bailador i koreografo en esta kompania por anyos. Para el, el kibutz era su kaza i su korasón.Nasido ayi de sovrebivientes del Olokosto, oy mismo el bive ayi.Komo chiko lavoro basho Arnon i Rami i nos dize esto «Komo mis parientes, Yehudit vino a Israel después del Olokosto para krear una vida nueva en un nuevo país i en un nuevo Kibutz. Parte grande de mi famiya murió en Auschwitz.Yehudit fue mi primera profesora del Baile i del Movimiento. Kuando tenia 3 anyos eya rekonosio mi talento en el kindergarten.Vido ke tenia el potensial i se izo mi Madriha/Guia. Era una kosa espesial para mi. Yehudit era dedikada al Baile i a la ensenyanza del Baile.»
Agora a sus 58 anyos,kazado, kon la ija i el ijo engrandesidos «Rami» es una inspirasión a los bailadores i koreografos a través el mundo. Desde ke entro en la kavesa de KCDC kreo 50 ovras para la kompania i fue mismo komisionado por kompanias internasionales de Graz Opera en Austria asta Ballett Basel en Suissa. Sin kontar la Kompania Bat Sheva. A la fin de este mes vienen a la Australia para jugar «Horses In The Sky/Kavayos en el sielo» en la Opera de Sydney.Sera por la primera vez afuera de Israel.Vienen aki kon 16 bailadores jugando la músika de «Bjork, Olafur Arlandi i Tim Hecker»
Rami invita al publiko a tomar parte en el viaje kon sus experiensias i interpretasiones personales.Prefera ver a su lavoro no komo una istoria,ma komo una sujestión ke ofrese al individuo. Rami sige sus eshenas i realidades,deshando al publiko kon sus memorias,sentimientos i pensamientos.
De ande viene la inspirasión de Rami? Viene de kosas diferentes, de la músika asta el baile,de las poesías,artíkulos i livros ke melda. De las pinturas,la eskultura asta la naturaleza.Todo esto krea un dibujo/dessen kompleto en la eshena.Todo se topa konektado.
Su mujer»Nitza» ke era una bailarina antes,lavora a su lado.Es un lavoro ke konsume a uno.Ma no tienen la intensión de abandonarlo.
Rami dize «Bivimos bailando 24 oras al día.No es komo uno ke se alevanta en la manyana i se va a la ofisina.Es un modo de vida i la kreasión de una visión kon el lavoro de la kompania.
Tradusido por Shimon Geron
Sydney
Fuente: Ladinokomunita
