LA TORTA – Un poko riyir

Mozotros las mujeres, ya savemos ke kaji en todas las rechetas de las nonas, no se topan mizuras djustas de los materiales.
 
Muestras nonas, uzavan palavras komo: un pokito, un punyadiko, el karar ke aferra etc….
 
Vos kero kontar una anekdota verdadera sovre este sujeto:
Mis keridos mama i papa, eran muevos kazados kuando un dia de viernes, se desidyo mi mama a fornar una torta.

Una ves ke era guerfana de chikes, no teniya la desdichada de mi mama, de ken ambezarse a kuzinar, entonses, demando a las amigas, ke i eyas tambien eran rezin kazadas.

Una le disho – batir guevos, la otra le disho adjustar un pokito de leche, la tresera le dyo idea -a djustar un punyadiko de levadura, i polvo/arina «el karar ke aferra».

Mi mama, tomo las ideas de las amigas i se mityo a prontar la torta….
Kuando la masa estava pronta, la arresento adientro de un tendjere redondo kon burako al sentro, i lo mityo al forno.

Paso una ora, la kuzina se incho de guezmo maraviozo, la torta se alteo i tomo kolor bronzado, parisia una torta de pasticheria.

Mi papa ya le esta kayindo las bavas, asperando kon pasensia a gostar de la torta.

Tomo mi mama un chini grande, abolto el tendjere kon la torta, enriva del chini, tomo el kuchiyo para kortar revanadas, la torta no se korta, aprovo otra ves – nada!
 
Hal ke le vino! la torta salyo pezgada i dura komo una piedra, la povereta empeso a yorar.
 
Papa, ke teniya buen senso de umor i la amava mucho a mama, le oferio su ayudo; malorozamente, ni el reusho a kortar la torta, no aspero mucho, topo un klavo a la pared tomo la torta i la enkolgo enriva, i le disho a mi mama :»na kerida, no te tomas sehora, la torta no se va echar al estyerko, vale para garnitura, se ve komo una estatua ermoza enriva de muestra pared».

Shabat Shalom a todos
de Sara Sufrin Baruch
Israel

Fuente: Ladinokomunita