La tia de Sulucha se izo asasina por Renée Martin

Ver más kuentikos de la Tia de Sulucha >>

-Tia, ke esta afitando? Mi marido se esta muriendo del sar [1]. Disho ke keres matar  a alguno.

-Ken yo? Dande parande? Yo en mi vida no ize danyo ni a una pluma. Te dizere lo ke afito. Tu marido i yo estavamos mirando la televizyon, i el program no mos plazyo del todo. Tu marido me disho: «keres apagar, tia?» Yo pensi de mi para mi , «deke me esta demandando esto? yo no tengo devdas para pagar». Le dishe: «no». I dospues le dishe: «amata, amata». Esto es lo ke oyo tu marido, se espanto, i se hue koryendo ande ti.

– Agora esto entendyendo: «apagar» en espanyol moderno kere dizir «amatar» en la lingua muestra.

– Dizile a tu marido ke se ambeze el espanyol halis, si no, no mos vamos a entender ni en mil anyos.

[1] Sar: espanto

 

Renée Martin
Payis de Gales (Gran Bretanya)
La Lettre Sepharade 36 – Desembre 2000

—————————————

*La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.