eSefarad Noticias del Mundo Sefaradi
Ver más kuentikos de la Tia de Sulucha >>
-Sulucha, ya fui i vine a Fransya en un puntiko. Bendichos los enjenyeros ke fraguaron el tunel debasho de la Manche. Estuve 2 dias kon mi amiga Diamante ke no avia visto desde ke eramos chikitikas.
-Dizeme lo ke izites en Fransya. Avlates en Franses?
-Parese ke la lingua de Molière no es komo me la ambezaron en las eskolas de la Alliance de Estambol.
-Deke, ke afito?
-Te kontare, hanunika. Una noche keriamos azer una karne asada en la huerta, al bodre de la mar. No avia muncha luz, i mos metimos en kamino en lo lusko i en lo brusko. La kaye estava vazia, no avia ni moshkas. Bushkimos i bushkimos, i a la fin topimos a la papasyega un kasap avyerto. En el magazen aviya i karne para asar i kimuriko [1] para el mangal [2].
Le dishe al kasap : dame un poko de «charbon». El me disho: kuantas revanadas kere, Madame? Yo pensi : karvon en revanadas? Dande salio esta moda mueva? Le dishe: kero un sako de «charbon» , i no en revanadas. Alora el kasap entendio i me disho: Ekskuzame, Madame. Eya disho «charbon» , i yo entendi «jambon».
Si me vo otra vez a Fransya me vo kedar boka kayada, no va dizir ni pi. No kero ke me entyendan gato por pato.
[2] Kimur: karvon
[3] Mangal: el brazero, el ogar
Renée Martin
Payis de Gales (Gran Bretanya)
La Lettre Sepharade 36 – Desembre 2000
—————————————
*La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.
