eSefarad Noticias del Mundo Sefaradi
Ver más kuentikos de la Tia de Sulucha >>
-Sulucha, kontame komo estuvo la fiesta de Suzanika.
Tia, mos engleneyimos muncho fina las tres de la demanyana.
-Alegres i gustozos ke estej syempre. Kuanta djente avia en la fiesta?
23 mujeres.
-Atyo, solo mujeres? Ande estavan los ombres?
Esta fiesta era «Hen Party»
-Hen Party? para mujeres henozas?
No, tia, la hen party es la fiesta ke aze la novya kon sus amigas antes de kazarse. Hen kere dizir gayna.
-Me paresio ke tu amiga Suzan ya estava kazada. Ke edad tiene?
50 anyos.
-Dospues de los sinkuenta se va kazar i va engrandeser ijos? Ya lo desho muy tadre!
Bueno, kualo ke te diga, mazaloza i venturoza ke sea, i ke tenga munchos ijos.
No te merekyes, tia, ke Suzan ya tiene un ijo i una ija grandes.
-Barmiman, tuvo ijos sin kazarse?
Si, i la ija eskojo el fostan de novya de la madre, i el ijo eskojo la araba para ir a la boda.
–Parese ke esto es echo de los inglezes. I kuando hue la boda?
La semana pasada.
-Ya no me dishites ke la fiesta de las gaynas se aze antes de la boda? Tu amiga izo todo a la roves; en primero tuvo ijos, dospues se kazo, i a la fin izo la fiesta.
Ya tienes razon, tia, en este pais no es solo el trafik ke kamina a lo roves, mizmo las famiyas son a lo roves. Kualo vas azer? Komo dizes los italianos: «Paese che vai, usanze che trovi».
—————————————————-
La Lettre Sepharade 55 – Sept. 2005
—————————————————-
Renée Martin
Payis de Gales (Gran Bretanya)
—————————————
La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.
