eSefarad Noticias del Mundo Sefaradi
A la okazyon de la komemorasyon del diya de la yegada en Israel de los djudyos ke son de desendiensa sefaradi, medyo orientala i persiana, me rendi kuento ke una koza fundamentalamente esta yerrada. La manera del ensenyamyento yerrado de la istorya sionista. La istorya de estos djudyos orientales o mediteraneos siendo yerrada en la deskripsyon eskrita en los livros aktual del sionizmo i ensenyada en las eskolas, puede tener konsekuensas danyozas ke devran ser korrijadas.
El sinyor Ashley Perry rekonosido komo un espesyalisto de la kestyon, mira lo ke eskrivyo: Estos ke eskriven sovre el sionizmo i deklaran ke su istorya ampesa kon Herzl, sin kererlo, dan a konoserla superfisialmente i sin profondita. Esto reenforsa en Israel la idea ke el sionizmo esensialmente fue i es un proyekto ashkenazi i ke los djudyos viniendo de afuera de la Evropa partisiparon a su istorya solo durante sus embolversyones en Israel despues de 1948.
No será djusto de pretender ke el movimiento sionisto empeso en el anyo 1890 en Evropa. El retorno de los djudyos a la tyerra aprometida no deve empesar solo kon lo ke se dechizyo en Basel, en Odessa o en Kishinev ma lo ke se pensó i se realizo muncho mas antes en las sivdades del oriente durante la peryoda del Imperyo Otomano, komo Salonik, Estambol, Izmir, Sana’a, Bagdad i Shiraz. Yehuda Bivas, Yehuda Alkalay i Donna Grasia fueron pratikamente los primeros sionistos de la istorya. Theodor Herzl apoyandose a estos primeros sionistos realizo la idea del estado djdudyo. Las sivdades modernas tal Tel-Aviv, Rishon Lezion, Petah Tikva, Gedera, Rehovot i mas otras fueron al empesijo puevladas por djudyos sefaradís i oryantalos muncho mas antes del arrivo de los ashkenazis de la Evropa orientala.
La manseves israeliana devra saver ke las komunidades del medyo oriente i del doredor del mediteraneo, empesaron a yegar a Yerushalayim muncho mas antes de las 5 olas de la imigrasyon de los ashkenazis a la tyerra santa. Desde 1740 los sefaradís vinideros de Espanya se establesieron en Yerushalayim i fueron los primeros olim de Israel de los siglos pasados. A esto devemos de adjustar ke munchos djudyos mediteraneos se establesieron en el Kineret, Sfad i Yaffo grasias a la sinyora Donna Grasia en el siglo 17. Lo ke eksplika ke la tyerra de sion nunka fue sin moradores djudyos, kaji a mayoriya orientales.
Ademas se deve de saver ke los djudyos del oriente siempre bivieron kon el sentimiento ke yegara el diya de retorno a las tyerras de sus antepasados i por esto konservaron la lingua de la Tora. Siertas minoridades de entre eyos ke se establesieron en la Palestina Ingleza avlaron el ebreo muncho mas antes del livro ‘El Estado Djudyo” eskrito por Herzl i mizmo de la peryoda en la kuala Eliezer Ben-Yehuda endjenyo el ebreo moderno. El tiempo vino de rektifikar los livros de istorya i de mirar a ke los profesores en las eskolas den a entender la verdadera interpretasyon del sionizmo. Los djudyos de la diaspora oksidentala en jeneral no saven ke el 50 % de la povlasyon djudia de Israel no es vinida de la Evropa. Sera djusto a ke esta realita verdadera sea eksplikada a todos los djudyos i mizmo en las yeshivot i en las sinagogas.
Devemos de akodrar ke los djudyos del oriente no vinieron a Israel komo refujiados despues de la deklarasyon de independesya del estado en 1948, eyos fueron miles anyos antes arondjados i retornan oy a sus tyerras, ke esta realita devra ser klara para todo el mundo, un antídoto kontra la idea ke el sionizmo es una forma de kolonializmo evropeo. La prezensya djudiya en tyerra de kanaan siempre egzistyo grasias a los djudyos del oriente.
Dr. Selim Salti
