LA SAVOR DE PENSAR A LO KE BIVI… por Sal Amira: Un diya de sol en COKAL

 

Los judyos sefaradis de SALONIKA en COKAL son duenyos de los veleros en el porto i bastante rikos.. Uno de eyos, SAMUEL PESSO, estava kontando a Papu Yako ke el se sintiya buen protejido por el Governo Turko i ke aviya investido parte de su kapital para fraguar un otel de 30 kamaretas en el puerto de COKAL, igual de el ke teniya en el puerto de SALONIKA en GRESYA….

Eran 4 ermanos i 2 ermanas ke emigraron i ke eran komersantes de peshkados, eksportando peshkado a laz sivdades serkas.

BRAVO A MI FAMIYA SEFARADI KE EN TAN POKO TIEMPO AREBIVYERON UN PUERTO DURMIENDO !. EN MI EDAD TENGO UN GRANDE ORGULYO DE VOZOTROS.

Yusef desidyo de kedar la noche en COKAL i enkargarse de unos sertefikados muevos ke ay ke azer para syertos veleros.

Papu, mi ermaniko i yo estamos indo a vijitar el HAHAM de la sivdadika, ISAK DANNON ke estava degoyando gayinas para el merkado i para los ke keriyan merkar. Es ansina ke el manteniya el kasherut.

ESTA NOCHE ESTAMOS ENVITADOS A DURMIR EN EL VELERO » HOHMA » DEL SENYOR SAMUEL PESSO.

El haham i mi Papu se dyeron este abraso sinsero yeno de amistad ke se dan los ombres sefaradis kuando se enkuentran.. Yo mizmo me syento igual ke eyos.

La Rubisa del haham DANNON le trusho una kaldera grande de agua para ke se lave las manos dospues del degoyo de laz gayinas. Este ayudo de la Rubisa travo mi attensyon i sinti la union entre marido i mujer, el lavoro unido ke aziyan para la komunidad judiya de COKAL i mantener el kasherut.

La Rubisa pishin se namoro de mi ermaniko YAKO. Kuando supo ke somos los ijos de su amiga de ckikez Flor Levi, mi madre, mos abraso kon mas sentimyento i vimos lagrimas en sus ojos.

Mos invito a komer por la noche a su kaza dospues ke saliryemos del kal.

El sol esta kayentiko, la briza de la mar de MARMARA esta saludavle. En la distansya, en la mar se ve dos naves guerriyeros echando umo en rumbo al Mediterraneo…. En este retrato se ve ke el mundo esta dayinda en guerra.

Ma aki, en este puerto, se esta bivyendo komo estar en Ganeden.

A kontinuar…

 

SALAMON AMIRA
CHANAKKALELI kon OPTIMIZMO

Sal Amira
CHANAKKALELI, EN MIAMI USA.

 

 

Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.

Fuente: Publicado en Sefaradimuestro – https://groups.yahoo.com/neo/groups/Sefaradimuestro