LA KONKISTA SILENSYOZA DE LOS ISLAMISTOS EN EL MUNDO LIBERO por el Dr. Selim Salti

Vemos kon tristeza i espanto las matansinas echas por los islamistos estos dalkavos anyos en Fransya i en Alemanya ke mos akodran las atrosidades del Hamas en el sud de Israel i ke son la kavza de los komplotos armados ke la Ermandad muzulmana enfiltrada en Evropa organiza. Mizmo los payizes arabos komo el Ayifto onde la doktrina de los Ermanos Muzulmanos fue kreyada, la defenden en eliminando o aprezando los miembros fundadores i sus disiplos. Visto esta situasyon, esta organizasyon inimiga de las demokrasiyas del oksidente ke mira de derrokarlas, a la kayades sin azer bruido kon los anyos tomo kamino i se establesyo en Evropa.

El dalkavo atentado de los teroristos en Berlin mos mostra komo eyos pueden atakar sin piadad i kuando dechizan. Mizma situasyon en la Suisa despues ke un islamisto kuchiyo 3 personas en el sentro de la sivdad de Winterthour. El atakante turko-suiso no reprezenta un kavzo asolado visto ke en 2020 4 teroristos miembros del Al-Kaida fueron arestados en Friburgo onde 700 sospechyozos fueron djuzgados por terorizmo el anyo pasado.

Los servisyos de informasyon evropeos sovre los simanes ke el Mossad les transmetyo el Hamas no solo se kontenta de terorizmo en Israel, ma apareja dezde munchos anyos atentados sangrientes en Evropa. En Febrayo 2023 8 mezes antes del atako del 7 oktobre la selula del Hamas en Alemanya resivyo el orden de organizar el arivo de armas del Libano i de aparejar un atentado teroristo bastante grande al stilo de los masakros kometidos en Israel. Sovre los investigadores de la polisia aleman los teroristos avian tomado komo eskopo de atakar la baza militar amerikana de Ramstein, la ambasada Israeliana en Berlin i el parko Tempelhofer Feld de la kapitala. Orozamente ke los atentados fueron impididos a tiempo.

El Hamas fue fundado en 1987 komo la seksyon palestiniana de la Ermandad muzulmana, la kuala tiene komo buto la destruksyon d’Israel i la eliminasyon de la prezensya djudiya en el Medyo Oriente. En dia de oy Israel lucha kon toda su fuersa militar el Hamas, kuando de su parte la Ermandad muzulmana arkitekta de la ideolojia del Hamas, a las kayades mira de influensar las institusiones politikas del mundo libero kon objektivo de derokar del interyor los fundamentos de la demokrasiya i de arebashar los djudyos kon una propaganda antesimita viseralmente egzistiendo en la memoriya kristiana. Ademas eya mira a vizar kon pasensya i sin peligro a transformar fondamentalmente la sivilizasyon oksidentala.

Para pueder kontrolar las sosiedades evropeas la Ermandad ajisa i mira de tener progresivamente el kontrol de las strukturas de los estados onde se infiltra. Empleya lo ke se yama la doktrina Tamkeen (biervo arabo) ke eksplika komo empleyar las stratejiyas umanas i politikas, sovre las kualas se mira de insembrar raises institusionales ke permeten de kontrolar progresivamente las strukturas de un estado, de una sosiedad durante un tiempo largo.

Afin de destruir los fundamentos oksidentales el ‘islamizmo lejitimo’ opera striktamente sovre las leyes oksidentalas afin de sabotarlas sin ke la djente se rende kuento del ayudo ke eyas les dan. En el oksidente oy se topa munchos tontos ke no se renden kuento de sus estimasyones yerradas del islam. Los ekspertos de seguridad evropeos ven la Ermandad muzulmana komo un lovo vistido de kodrero, ke mira sistematikamente de ovrar kontra las libertades demokratikas kon pasensya, sin presuro por ke su buto final es de krear un estado teotratiko mundial sovre los prensipyos de la sharia.

Sovre los partizantes los mas importantes de los Ermanos Muzulmanos son el governo de mollas del Iran i el governo turko de Erdogan i su partido politiko AKP. El ke da un muy grande apoyo ekonomiko al lavoro de propaganda islamisto es el Katar. Miliardas de dolares proviniendo del Katar fueron investidos en el mundo para krear un atmosfero pozitifo sovre el islamizmo. Para protejar estas aktividades la Ermandad uza el sistema nomado marhaliyyah ke kere dizir adaptasyon de un diskorso falso, enganyador al langaje oksidental. Kon este sistem el Katar enkoraja el boykot del estado djudyo i mira de retornar la opinyon publika kontra Israel.

La Ermandad no pensa en trimestros ma en siglos. Kale segir el Ayifto, la Arabiya Seudita, los Emirates ke se adjuntaron kontra esta gezera i ke kale ke el oksidente aga lo mezmo kuando el keda paralizado achakes de su bovedad buenacha. No kale ke permetan a ke los islamistos agan nidos politikos en sus payizes. Un payiz ke no da importansa a sus fundamientos relijiyozos i politikos i no se proteja del islamizmo perye kon tiempo su kapachita de defender la asimilasyon de sus sivdadinos.

Israel i sus aliados deven de alarmar a este sujeto el oksidente entero. Israel en partikular deve de tener un rolo prinsipal kontra el islamizmo en aklarando sus menasas sovre la sosiedad demokratika i además en mirando de konvenser los responsavles oksidentales del perikolo ke los aspera, en dandoles ransenyamentos ke puederan servir a sus servisyos de informasyon.