eSefarad Noticias del Mundo Sefaradi
Sovre las Kreyensyas Mistikas de los
Sefaradim del Oryente
Moïse Franco, istoryano de los djudyos de Turkiya, es en mizmo tyempo, el otor de una ovra, ke trata de «las syensyas mistikas de los djudyos del Oryente.«(1)
Esta ovra, redaktada en Edirne a la fin del siglo XIX, es la kompilasyon de tres manuskriptos. El primer fue redijido en ebreo en el anyo 1676 por el Rabino Ishak Ben Saal de Rodosto (Tekirdağ). El segundo i el en ebreo, ke yeva la mizma data, fue kopyado por un syerto Abraham Shaki. El treser sin data, fue redijido en djudeo-espanyol por el Rabino Yehuda Graziani, nasido i el en Rodosto en el anyo 1835. Estas tres ovras ke se kompletan entre eyas, tratan de los diversos domenos de la mistika praktika, ke Moïse Franco arekoje basho el titolo de syensas mistikas.
En este livro es rakontado komo se puede uzar de la valor numerika de los nombres, de las linyas de la mano, del kameo, de la influensa de las estreas, del diya i de la ora ke el enteresado konsulta el indevino i en yamando espiritos divinos, para endevinar el futuro, para suanyar malatiyas i ser protejado de diversos males, para meldar el penseryo de una persona konsernando su buto de adresarse al endevino, para saver el karakter futuro de un rezin nasido i la edad ke va alkansar, si un kazamyento sera orozo i sovre la reushitad en el komersyo i otros – en nomando 28 posibilitades por las kualas se puede konsultar un endevino.
Un prekante sovre el tratamyento de una emosyon nervoza ke aparese en el livro de Franco, lo aviya publikado en Aki Yerushalayim(2). Portanto se pueden konstatar en esta ovra, otras formulas de aktos mistikos estranyos, de syertas de las kualas va aprovar de dar un rezumido.
Es rakontado ke para ver los espiritos se puede uzar de un remedyo muy simple(!):
«Toma el ojo de un gato i el ojo de un gayo, sekalos i despues de los aver ahajado frega sus polvo a tus ojos. Ansi puederas ver los espiritos i avlar kon eyos. Sovretodo akodrate ke kale ke seyas asolado en la kamareta, porke, si estas akompanyado de una otra persona los espiritos no te van apareser…»
Uno de los butos del mistisizmo praktiko es la relevasyon del pasado i el devino del avenir. Para arivar a esto es rakontado:
«Toma un kuchiyo kon manga preta i trasa kon su punta un serklo a la tyerra en frente del sol. Toma una vaza de kapasitad de dos okkas. Inchela de agua i adjusta un poko de sal i de azete de oliva. Despues traye un ijiko, ke no alkanso aynda ala pubertad i manko de katorze anyos. Asentate kon el ijiko en basho en medyo del serklo. Despues de aver gratado kon el mizmo kuchiyo la unya del dedo medyano del ijiko, enkasha su dedo en la azete de la vaza. En azyendo esta operasyon, kale ke el ijiko no se meneya i su mirada seya fiksada al punto de su dedo. Tu el rabino, aserka tus mushos de su oreja i prononsa tres vezes estas palavras:
‘Kashin, Makshin, Nakshin! Vos rogo, avozotros, Kalyon, Kalyon, Kalyon, de revelar a este ijiko ke esta aki la repuesta a esta pegunta’ (a este momento kale formular lapregunta).
Ansi, el ijiko vera en el azete las personas i los evenementos ke se keren konoser i rakontara todo lo ke ve i oye. Despues de esto, kale pardonarse por el dezrepozo provokado a estos espiritos misteryozos.»
Para deskuvrir el lugar del oro i de la plata, kontenidos en una mina es rakontado:
«Toma un pedaso de oro, reduizala fina syete vezes de su pezo en polisandolo i rendela a una plaka. Eskrive a esta plaka las 21 letras ebreas siguentas… Toma una palomba jovena i ata a su garon esta plaka kon un ilo de lino i libera el pasharo. Despues suvete a un techo para ver ande aterisara. Esto es lugar bushkado. Repeta esto fina syete vezes i kavaka syempre el lugar ande ateriso el pasharo. Ansi toparas sin dingun falta el manadero presyozo.»
La Erensya Mistika
Los endevinos ke sean djudiyos, muslumanos o zinganos syempre profesaron i kontinuan a profesar sus ofisyo. Franco mos konta ke en el tyempo ke eskrivyo su livro, egzistiya en Izmir, el endevino renomado, un syerto Harebi Shlomo ke mizmo altos fonksyoneres del Estado de todas las partes del payis lo konsultavan. Sigun Franco, en 1895 el Sultan Otomano aviya demandado al vis-mayor de Estambol, el Sr. Behor Effendi Eshkenazi de eksplikarle de kualo tratava un manuskripto en ebreo ke se topava en la bibliotek de su palasyo. Despues de ser egzaminado, fue konkluido ke esto era una ovra mistika, prezentado en el pasado a uno de los sultanes.
Probablamente, las kreyensas i los praktikos mistikos de los sefaradim del Oryente fueron influensados por las kreyensas i los praktikos de diferentes puevlos i relijyones, kon los kuales eran en kontakto, porke los preseptos del mistsizmo eran sakros i valables para todos. Los djudyos ekspulsados de la Peninsula Iberika, trusheron kon eyos sus erensya mistika, ke en mesklandose kon la erensya mistika otomana-djudiya se formaron las kreyensas de los sefardim del Oryente.
Los doz manuskriptos ke sirvyeron a la redaksyon del livro de Franco, son datados del anyo 1676. Probablamente,las kreyensyas del treser manuskripto ke kompleta a estos doz manuskriptos tyenen tambyen unparte de sus raises en el mizmo siglo. El siglo XVII, reprezenta una peryoda de instabilitad sosyala, politika i kulturala por el Imperio Otomano. De mismo, es markado por gerras, solevamyentos i la renesensya de esperansas mistikas. En estos diyas, las komunidades djudiyas del Imperio, del Oriente i de la Evropa fueron ebranladas por la egzaltasyon mistika i despues por la desepesyon provokadas por el movemiento mesianiko de Sabetay Sevi. Es en Edirne i en esta peryoda, ke fue fondada la komunidad de los ma’aminim sabetayistos. Muy probablamente, la redaksyon de estos manuskriptos, fue en parte inspirada i influensada por las razones i las konsekuensas de este movemento.
En muestros diyas, los kaminos de la pensada rasyonalista i akeyos de las kreyensas mistikas son separados. Portante durante la istorya, estos dos domenos eran mesklados entre eyos. Ansi, para jenerasyones enteras las kreyensyas mistikas sirvyeron entanto ke manadero de konsolasyon i deesperansa en sus luchas de kada dia i en sus dezastros.
Esta figura ke aparese en la facha del livro, no tyene dingun atadijo direkto kon su kontenido. En el sentro del serklo se remarka la letra Yud, primera letra en Ebreo del nombre sakro del Dyo. Las kuatros letras en Ebreo de este nombre, aparesen en las ekstremitades de una krucha. Esto todo reprezanta probablamente la kreasyon del universo i los kuatros elementos prensipales: el Fuego, el Ayre, la Agua, la Tyerra.
El Saver es reprezantado por una Ejipsyana, el Koraje por un agilo, el Kayades por un toreo i el Dezeo por el Diavlo
Estas son las doz fasadas de una “kamea” ansi ke aparesen en el livro.
La primera fasada, ande aparesen los nombres de los andjelos, reprezenta la espada de Ashmodai, uno de los prensipales andjelos del Dio.
En la segunda fasada, aparese en el sentro el nombre del andjelo Metatron, ke es konsiderado komo el mas importante andjelo i asigun syertos mistikanos es el kreador del universo. A su entorno se remarkan los nombres de otros andjelos. El sirklo es entornado de una formula majika, ande se remarka el byervo “Satan.»
——————————————————————————
Giyo Bibliografiko:
(1) Franco Moïse – Les Sciences Mystiques chez les Juifs de l’Orient. Edition de l’Initiation, Paris, 1900.
(2) Aki Yerushalayim, XIV, 47, 1993, p. 49.
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
