eSefarad Noticias del Mundo Sefaradi
Tres konsejikos de Djoha
Djoha i el Kochero
Djoha, entero enflamado entra kon sanyo a su kaza i se mete a pelear por nada kon su mujer:
«Ya esto enfasyado, me esto indo de esta kaza!»
Su mujer entero alborotada korre detras d’el en demandando:
«Ande es ke t’estas indo? Dizeme a lo manko ande te vas…»
Djoha serra en chapteyando la puerta, i sale sin responder. Una vez en la kaye, aze kedar a una karosa i entra aryento sin dizir un biervo.
El kochero:
«Buenos diyas Djoha. Ande te keres irte?»
«Komo de koza es ke me estas demandando? No lo dishe mizmo ni a mi mujer, i tu keres ke te lo
diga a ti!«
———————————————————————
Gad Nassi
Ilustrasion: Roz Kohen
———————————————————————
Djoha i el Dasyo
Un diya kuando Djoha se estava arodeando en la guerta de la sivdad, en supito, un ombre deskonosido se aserko de el i le dyo un chaketon bueno en su nuka. Esto fue un chaketon tan fuerte ke Djoha se arezvalo de su lugar fina ke estuvo para kayer.
«Komo de insolensia es esto!» se revolto Djoha.
El ombre, se ekskuzo pretendiendo ke se avia yerrado en tomandolo por uno de sus konosidos. I, kon muncha arogansa, adjusto ke Djoha estava egzajerando en reajisando tan fuerte.
Djoha, entero ofensado, respondio ke su akto deve ser djuzgado por el tribunal. I ansi, los dos se apararon delantre de un djuzgo, ke era un buen konosido del ombre ke avia dado el chaketon. Ma, ke los eskucho kon kalmo en asemejando ser onesto.
«Bueno Djoha Efendi,» proklamo el djuzgo. «Kual kere ke seria en tu lugar, se iva revoltar de la mizma manera. Ke pensaz si te permetia ke i tu le darias un mizmo chaketon?»
«No!» disho Djoha, i adjusto:
«Esto no me va satisfezar.»
«Si es ansina, kondano al kulpavle a pagarte un dasyo de sinko groshes.«
I, ordeno al ombre de ir a trayer los sinko groshes.
Entonses, se hue el ombre, i Djoha, estuvo asentado, asperandolo oras enteras fina ke ya vino la ora de serrar el tribunal. Viendo ke no ay ses seda, Djoha eskojo un momento kuando el djuzgo estava okupado, para darle un chaketon bueno a su nuko:
«Me ekskuzo su Eminensia. No puedo mas asperar. Kuando su amigo
arivara, ke los tome el, los sinko groshes ke me deve.«
——————————————————————-
Gad Nassi
Ilustrasion: Roz Kohen
———————————————————————
Djoha i Harun Rashid
Un diya, el Rey Harun Rashid se apersivio ke Djoha tenia en sus manos un livro grande, i kestava eskriviendo ayi.
«Kualo es este livro?” le demando.
Le respondio Djoha:
«Esto es el Livro de los Bovos.» I, adjusto:
«Kada vez ke veygo ke una persona aze una bovedad, eskrivo su nombre.»
«Muy bueno azes,» le respondio el Rey.
Un diya, Harun Rashid echo un ojo a este livro, i se apersivio ke su nombre estava eskrito en el Livro de los Bovos.
«Deke eskrvites mi nombre?» le demando.
«Esto es la razon,» disho Djoha. «Un diya vide ke dates mil dukados de oro a un ajeno, ke avia arivado a muestra sivdad de un payis ajeno, para ke trayga vistidos de sedo al Rey. Kreygo ke es una bovedad de dar tan muncho de moneda a una persona ke no konosez.»
«I, si la persona traye los vistidos de seda?» le demando Harun Rashid.
Djoha respondio:
«Akel tyempo kitare tu nombre, i en su lagar eskivire lo suyo.»
———————————————————————
Del folklor de los djudios de Irak
Gad Nassi
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
