eSefarad Noticias del Mundo Sefaradi
Los Animales Rekonosientes
Un dervish apersivio en su kamino un foyo ondo, asigun los kasadores uzan de kavakar para aferar animales salvajes. Ariento de la foya estavan un ombre, un munyako, un viper i una kulevra, ke venian de ser aferados i no podien salirsen del foyo.
“Agora tengo una buena okazyon de azer un mitzva en salvando a este benadam,” se penso de si para si el dervish. En esto echo al foyo una kuedra bastante larga. Portanto, el munyako ke es un animal mas ajilo de los otros, afero pishin la kuedra i fue travado por el dervish ahuera del foyo. El dervish echo por la sigunda ves la kuedra ma, fue el viper ke fue travado del foyo. I, a la tresera ves, la kulevra se salvo.
Los tres animales rengrasiaron al dervish, i le disheron:
“No la traves a esta persona del foyo para salvarlla. Porke no egziste en el mundo una kreyensia ingrata i sin piadad komo el ombre i, partikularamente komo esta persona ke fuimos en su kompanyiya en el foyo.”
El munyako adjusto: “yo bivo en tal i tal lugar”; el viper: “yo bivo en tal i tal marekajo” i la kulevra: “yo bivo en tal i tal rio.”
Despues ke lo rengrasioran de muevo le disheron ke syempre se van a akodrar d’el i ke el dervish ke se akodre syempre de eyos. Puede ser ke un diya el pasara allado de ande moran i tendra menester de sus ayudo. Le disheron:
“Seremos orozos de ayudarte i de ekspresar muestra rekonosensya a usted en pagandole todo lo ke izo para mozotros.” Despues kada uno partyo a su kaza.
El dervish no dando importansa a lo ke los animales le disheron, echo de muevo la kuedra al foyo i travo a la persona ahuera del foyo. El ombre ke fue salvado le disho:
“Yo so un orfevro i si un diya estaras en mi sivdad, akodrate de mi i no faltes de vijitarme. Siguro ke te va ekspresar mi rekonosensia por todo lo ke izites.”
Despues de muncho tyempo arivo ke el dervish paso por ande estava el foyo i enkontro al munyako ke avia salvado. El munyako pishin lo rekonosio:
“Me gusti muncho de averlo visto de muevo. Regreto de no tener nada de ofreser a usted. Ke se deskanse un poko ke ya le va trayer una koza.”
En esto el munyako salto kon prestes i abolto kon un kantaro yeno de sumo de fruta freska.
El dervish despues ke le paso el ser i se deskanso un poko, salyo al kamino i se enkontro kon el viper. El viper ke se gusto muncho de verlo le disho:
“Lo ke su piadad me izo, yo no lo puede olvidar. Usted me salvo de una muerte sigura. Le rogo de deskansarse un poko fina ke va aboltar.”
Entretyempo el viper se fue i se suvyo a la pared del palasio real, ande moryo i la mato a la Prensesa i le tomo sus eskularichas i su kolana. Abolto ande le estava asperando el dervish i le dyo todas estas djoyas sin dizirle ni un byervo sovre lo ke avia echo.
“Agora ke estos animales ekspresaron sus rekonesensia, me va ir ande el orfevro ke lo salvi del foyo. Esto siguro ke el me va dar una rekompensa mas grande. I, si no tiene de darme nada, a lo manko me va ayudar a vender a estas djoyas.”
Pensando ansina, se hue ande el orfevro, ke le disho ke se gusto muncho de enkontrarlo. Portanto, asigun ke egzamino las djoyas el orfevro se rendio kuento ke estas eran las djoyas arovadas del palasio.
“Aspero un poko aki fina ke va aboltar,” le disho al dervish. I, pishin se fue al palasio a meter en koriente el Rey de lo ke se estava pasando:
“La persona ke mato a tu ija i ke se arovo sus djoyas esta en mi kaza. Todo lo ke ay de azer es de embiyar djente i de arestarlo.”
El Rey pishin embiyo sus servitores para ke traygan el dervish a su prezensia. Despues de aver rekonesido las djoyas de la prensesa ordeno el Rey de atar al dervish, de kitarlo ahuera de la sivdad i de krusifiarlo despues de lo aver eskorchado.
El povereto del dervish empeso a gritar en las kayes del sivdad kuando lo estavan yevando a matarlo:
“Ke pekado ke no oyi lo ke los animales me avian enkomendado i salvi a este orfevro. Si los oyiya, no me iva afitar esto todo malo.”
En esto, la kulevra oyo a estos gritos i salio de su burako para ver lo ke se esta pasando. Kuando vido al dervish ke lo avia salvado, su korason se incho de piedad i empeso a pensar de ke modo lo puedera i eya salvarlo. Se fue pishin al palasio i lo moryo al Prens.
Todos los savidos, ichizeros i medikos fueron envitados al palasio para suanyar al Prens. Eyos disheron orasyones i berahas majikos, alimpyaron su feridura i le dyeron melisinas. Portanto, nada no le estava provechando i el Prens estava kontinuando a ser mas malo de diya en diya. En esto se desidieron de konsultar a las estreas de los sielos, laskualas kon sus poder majiko retornaron al prens su poder de avlar:
“Nada de esto todo no me puedera amahar ma, solo si me trayirash allado de mi el dervish ke fue kondanado a murir i si el pozara su mano enriva de mi feridura.”
El Rey enkantado, ordeno ke en primero el prizonero aparese delantre del para ser kestionado. Entonses, el dervish le konto todo loke le avia pasado i de ke modo las djoyas le avian arivado. Despues, alevanto sus ojos al syelo i empeso a orasionar:
“Sinyor del mundo. Tu solo sos el ke save ke mi korason i ke mis manos son limpyas. Amahalo agora al ijo del Rey para provar mi inosensya.”
I el Dio tuvo piadad i kuando el dervish metio su mano enriva de su feridura, amaho al ijo del Rey en salvandolo de todas sus sufriensas.
El Rey le dyo al dervish munchos regalos i al orfevro lo mando a la forka.
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
