eSefarad Noticias del Mundo Sefaradi
Las almas pedridas de São Tomé
En segito del Edikto de la Ekspulsion deklarado por Ferdinand i Isabella en Marso 31, 1492, los djudios de Espania ke no se avian konvertido, se refujiaron en payizes diferentes.Munchos de estos eran konvensidos ke el payis vizino, Portugal, puederia ser sus muevo ogar – portanto, sin ke dinguno de estos avia previsto la amarga sorte ke los asperava.
El Rey João II (1481-95), interesado a enrikeser su trezoro, los avia akseptado, en ovligandolos a pagar una taksa. Los artizanos fueron akseptados en el buto de uzarlos en la produksyon de armas. Kon la kondision de kedar en Portugal fina 8 mezes, famiyas rikas pagaron 100 kruzados, kuando la grande mayoriya pago 8 kruzados por persona.
Kon sus arivo a Portugal, los egzilados fueron el objekto de presiones del governo i del puevlo. Siertos los akuzaron de aver traido la plaga, kuando otros, de blasfemar las ensenyensias de la Iglesia.
Kuando en la primavera 1493, el termino de 8 mezes se avia eskapado, el rey João II tuvo kargo ke solo un numero chiko de naves se ofresen a transferarlos. En konsekuensia, unos pokos djudios reusheron a salir del payis. El resto fue akuzado de aver violado el permiso de kedar en el payis, i konformamente a una de su estipulasion, fueron deklarados esklavos, a menos ke aksepten el baptizmo. Es en este konteksto, ke iva akonteser una de las mas orivles trajedias del Djudaismo Sefardi.
En el mizmo anyo, unos 2000 ijikos i ijikas, en la edad de 2 asta 10, fueron arankados de sus famiyas i despues de ser baptizados, mandados komo esklavos a la islas afrikanas, São Tomé i Príncipe, situadas en el Golfo de Guinea.
Konosidas akel tiempo komo las islas de los lagartos, São Tomé kon Príncipe azian parte de las kolonias de Portugal. Los logartos eran en realidad, krokodiles i kulevras venenozas. El klimato era insalubre, todo en permetiendo espesialmente el kultivo de la kana de asukar.
Durante su ekspansion teritorial, el problemo de Portugal fue la karensia de sus abitantes en la metropol i en konsekuensa, la diffikultad de rekuperar un numero satisfezante de emigrantes para povlar sus kolonias. De maz, São Tomé i Principe eran leshos de ser atraktivas. A las islas eran transferados prizionieros negros i esklavos de orijen afrikana.
El destino de estos ijikos, resivio una konsiderable atension en las kronikas. Kuaji todas las narrasiones reportando la eksperiensa de los djudios de Espania apatriados a Portugal se referan a estas kreaturas arevatadas de sus parientes i deportadas komo esklavos a estas islas deziertas, para ser kriados komo kristianos i ke sierven komo kolones.
De otra parte, no egziste dingun dokumente, djustifikando o aklarando el motivo del Rey de Portugal de implementar una tala akta kruala i sin presedente.
Munchas fuentes djudias deskriven la detresa de los jenitores ke pedrieron sus kreaturas. Un episodio reportado por Ibn Verga, ke el mizmo avia yegado a Portugal en 1492 kon su famiya, es partikulatmente esmoviendo:
Uvo una mujer ke le avian tomado sesh ijos. Kuando oyo ke el Rey estava para salir de la iglesia ande avia asistido a la misa, esta desfortunada empeso a implorar su mizerikordia en arondjandose a los piezes de su kavayo, i rogandole ke le vuelva el maz mansevo de sus ijos. Ma el Rey no kijo eskucharla. Ordeno a sus servidores de alesharla de su vista.
La mujer kontinuo a defender su kavzo kon gritos mas fuertes i los servidores la maltrataron. Entonses, el Rey se eksklamo: «Deshaldola, es komo una puta ke le tomaron sus krios!»
Es de mizmo reportado ke kuando sus parientes konstataron ke la deportasion de los ijikos era inevitable, les demandaron de observar las Leyes de Moshe; i ke avian mizmo kazado entre eyos a unos kuantos de estos.
Munchos de los ninyos, murieron de ambre, de dezespero i de tristeza, o devorados por kos krokodiles o modridos por las kulevras. Valentim Fernandes, un printor aleman ke se avia establisido en Portugal en 1495, publiko en 1510, una deskripsion de la Islas São Tomé i Pricipe, en bazandose al testimonio de marineros ke las avian vijitado. Fernandes reporta ke de los 2000 ninios ke arivaron a la Isla, solo 600 avian sovrebivido fina la edad adulta.
A los ninyos fueron impozados muevos nombres, obligandolos a niyegar sus pasado; uvo tambien posibles uniones insestuozas. Kuando kresieron, los jovenes se kazaron entre eyos o kon jovenes de otros grupos etnikos, espesialmente negros.
Al pareser las rogativas de los padres konsernando la observasion de la Ley Djudia por sus kreaturas, no fue en vano. Informasiones yegaron a la Ofisina de La Inkizision en Lisbon ke en São Tomé i Príncipe se produizeron insidentes de la observasion avierta del Djudaismo. La Iglesia Katolika se ensanyo muncho. Pedro da Cunha Lobo, el obispo katoliko romano nominado a São Tomé i Príncipe, se obsesiono kon esta kestion.
Asigun una fuente, el diya de Simhat Tora 1621, da Cunha, se desperto por el bruido de una prosesion, salio korriendo para konfrontarla i fue tan molestado por los manifestantes ke kon asko renonsio a su posto i tomo la primera nave para aboltarse a Portugal.
* * *
São Tomé i Príncipe se konvertieron en uno de los mas importantes produktores de asukar del mundo. Las islas obtuvieron sus independensia de Portugal el 12 de julio, 1975. Kuaji 500 anyos despues de la deportasion, se izieron ekskavasiones allado de la Katedrala, en el sentro de la sivdad, para anchear el muevo palasio prezidensial. En el lugar enkontraron tombas i una espada. Se kreye ke la espada avia apartenido al Kapitan Álvaro de Caminha, ke fue kargado de transferar i aresentar a los ninyos en las islas; i ke las otras tombas apartenian a los ninyos djudios deportados.
Kon la yegada de unos kuantos komersantes djudios de kakao i de asukar en los siglos XIX i XX, una mueva komunidad fue fundada. Oy en diya no ay djudios konosidos komo pratikantes, ke biven en las Islas. Todo kon esto, egziste una partida de la povlasion ke se distenge kon la klaridad de sus kolor.
Es muy probable ke la sangre de los ninyos esklavos korre oy por las venas de algunos de los moradores de la aktuala República Independiente de São Tomé i Príncipe.
En 1993, Moshe Liba, el primer Embasador de Israel en la Republika fue kalorozamente resivido en São Tomé. Liba observo ke, kon sus kolor maz klara, kon la fiertad konsernando sus pasado i sus dezeo de kontaktar djudios de otros payizes, los desendientes de las kreaturas deportadas formavan una parte distinktiva de la povlasion. Aun ke eran meskladas kon komponentes sosiales i kulturalas kreolas, siertas kustumbres djudias se avian mantenido.
Ansi se eksprime el Embasador Liba, en su livro tan emosionante komo fasinante:
Kuando prezenti las letras kredensialas, me disho el Presidente Miguel Trovoada: «Tenemos raizes komunes, desendientes de djudios biven en muestras islas. Usted enkontrara aki nombres djudios komo Azacot, Levy, Samuel.»
Despues de la prezentasion i la konversasion protokolar kon el Presidente, tuvo lugar la prosesion militara en onor del primer Embasador de Israel…
Aze 500 anyos, trayeron akí a mis antepasados komo esklavos, oy entonan el “Hatikvah,” la Esperanza, muestro imno nasional, en onor de Israel, la patria del Puevlo Djudío.[*]
*
En Julio 12, 1995, kon el eskopo de komemorar las kreaturas esklavas ke fueron arankadas de sus jenitores en el siglo XV, se organizo, en el konteksto de la selebrasion de la Independensia XX de las Islas, una konferensia internasional. Reprezentantes de Israel, de los Estados Unidos, Fransia, Holanda, Portugal i Espania asistieron a esta aktividad.
—————————————————
[*] Moshe Liba (Author, Editor), Jewish Child Slaves in Sao Tome
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
