eSefarad Noticias del Mundo Sefaradi
La Kolana
En la sivdad de Kordova bivia un ombre ke se yamava Yaakov. Yaakov era una persona piadoza i onesta ke se mantenia de su lavoro entanto ke komisionario. Avia ganado la konfiensa de sus klientes i todos lo respektavan.
Un diya le avian entregado una kolana muy valutoza para ke la vende por sinko syentes monedas de oro. Esto era una kolana muy ermoza, lavorada de una manera muy artizanala i ornada kon djoyas i perlas. Kuando Yaakov le estava bushkando un merkador, enkontro a un administrador superior del palasio real, ke le demando sovre la kolana.
“Senior,” disho Yaakov, “esta kolana me fue entregado para ke la vende por sinko syentes moneda de oro.”
“Lo poderas vender por kuatro syentes?” le demando el ofisial. Ma, Yaakov refuzo, porke su vendedor no era pronto de venderla por manko de este presio. Entonses, el administrador ambisiozo ke se avia desidado de posedar a esta lolana, le disho:
“Ven kon mi a mi kaza para ke la amostre a mi mujer. I si le plazera, la va merkarla al presio ke me demandates.”
Yaakov, sin supsonarse de nada, segio al ofisial a su kaza. Kuando arivaron a su puerta, el ofisial tomo la kolana de sus manos i le demando de asperar un poko. Despues entro a su kaza i serro la puerta. El prove de Yaakov aspero ahuera buen karar de tyempo i kuando se izo de tadre i la puerta se kedo serrada, se izo de negra umor i abolto a su kaza. Se hue a echar a su kama sin komer nada i no pudo durmir noche entera, tan grande era su afliksion por la perdision de la kolana.
A la madrugada del diya de amaniana korio a la kaza del administrador i se kalmo un poko kuando lo vido salir de su kaza para ir a su lavoro en el palasio. “Senior,” disho Yaakov, “kere merkar la kolana? Sino la vendere a otro.”
“No se de ke kolana estas avlando?” le respondio el ofisial.
“De la kolana ke ayer tomates de mis manos para amostrarla a tu espoza,” le respondio Yaakov.
“Loko sos kualo sos,” le disho el ofisial, “si mi onor no me empidia de azerlo, te kortava tu garon kon plazer para kastigarte por tu insolensia.”
Kuando Yaakov vido la birra del kurtizano, se espanto buen karar i korio pishin a la Korte de la Djustisia. Kuando el djuzgo lo miro, apersivio en su kara los sinios de una detresa grande.
“Kualo te akontesio?” le demando. “Deke estas tan trublado?”
“Senior,” disho Yaakov, “tengo un dert muy grande, ma no ozo de kontarle porke me demando si usted se kreera en mis palavras.”
“Kontame todo,” le disho el djuzgo. “Porke ya se ke sos una persona onesta i de konfiensa, ke nunka no avla mintiras.” Enkorajado de estos byervos, Yaakov konto al djuzgo todo lo ke le avia akontesido en adjustando ke en este kavzo, solo la muerte lo puedia salvarlo.
“No peries konfiensa,” le disho el djuzgo. “Yo te va ayudarte para ke la kolana te sea retornada.”
Al diya de amaniana, el djuzgo invito a su korte a todos los nobles de la sivdad, ansi ke a las personas savias, mismo ke esto no era de uzo. Antes ke esta djente arivan, le disho a su servidor:
“Kuando tal i tal persona arivara i kuando kitara sus kalsados en la vestibula del korte, pishin toma a uno de sus kalsados i korre a su kaza. Despues demanda de su espoza de darte la kolana ke su marido trusho a su kaza antier, porke le plaze de amostrarla a sus amigos para ke admiren su esplendor. Entanto ke prova de la verasidad de tus byervos, le amostraras el kalsado de su marido.”
El servidor izo asigun ke le fue enkomendado, i la espoza del kurtizano en viendo el kalsado de su marido no se suspecho de nada i sin dizir nada dyo la kolana al mesajero, ke pishin la trusho al korte.
Kuando todos los nobles i las personas savidas ke fueron invitados se avian ido, el djuzgo demando a su servidor si trusho la kolana. I kuando el servidor le dyo la kolana, el djuzgo lo yamo al Yaakov.
“No te merikies mas,” le disho. “Tengo la kolana ke la salvi del ladron.”
I kuando Yaakov vido a la kolana salto de su alegria i rengrasio al djuzgo i le bezo sus manos.
Gad Nassi
Ilustrasion: Lucy B. Elkivity
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
