eSefarad Noticias del Mundo Sefaradi
La Kabana de las Lamparas
La Kabana de las LamparasAvia de ser un buen Djudyo ke se avia metido a bushkar la djustisia en este mundo. Era konvinsido ke la djustisia verdadera deveria de egzistir en un kualkere kanton, ma ke el no la estava topando. Su bushkidad ya avia turado anyos. Se hue de sivdad en sivdad, de kazal en kazal, in en dingun lugar a la djustisia nunka la topo.
De este modo anyos pasaron fina ke avia eksplorado kada lugar konosido, aparte de un ultimo grande foresto. Entro a este foresto aleskuro sin ezitar, porke grasias a su eksperiensa, ya se avia auzado a no espantarse. Arivo a las kavernas de los ladrones i los ladrones se burlaron de el:
«Es aki ke pensas ke vas a topar la djustisia?”
I se hue a las kabanas de las ichizeras, ande estavan eskaldando sus ichizas. I, eyas se rieron i se burlaron de el:
«Es aki ke pensas ke vas a topar la djustisia?”
El buen Djudyo se hue mas i mas ondo en el foresto, fina ke arivo a la madrugada a una kabana chika de platra. A traveso su ventana apersivio un mabul de flamas meneyandosen, i le tomo la kuriozidad de saver lo ke se estava pasando. Se hue a la puerta de la kabana i la chapteo. No uvo repuesta. La chapteo de muevo. Dinguno no respondio. En esto, pusho la puerta i entro ariento.
Una vez ariento, realizo ke el interior de la kabana era muncho mas grande de lo ke paresia de ahuera. Estava yena de miles de etajeras, i en kada etajara dozenas de lamparas de azeyte. Syertos de estas lamparas eran en chanakas valutozas komo oro, plata o marbolo. Otros eran en chanakas baratas de platro o de teneke. Syertas chanakas eran yenas de azeyte i sus kandelas estavan briyando fuerte, kuando en otras avia kedado muy poko de azeyte.
Ensupito, aparesyo en frente de el, un vyejiziko kon una barva blanka i vistiendo un fustan blanko. Le disho:
«Komo puedo ayudarte?”
El Djudyo respondio:
«Paz por ti! Me estuvo arodeando para topar la djustisia, ma no enkontri nunka una koza semejante. Dizeme ke bushkan aki estas todas lamparas?»
El vyejo respondio:
«Kada uno de estas lamparas es la alma de una persona. Todo el tyempo ke la lampara esta asendido, la persona keda en vida. I, kuando se amata, su alma parte de este mundo.»
El Djudyo demando:
«Me puederas amostrar la lampara de mi alma?»
«Ven detras de mi,» le disho el vyejo, i lo yevo a un labirento sin fin. I, kuando arivaron a una etajera basha, le amostro una lampara en platro:
«Aki esta la lamparade tu alma.»
Kuando el Djudyo lo miro, le tomo un espanto muy grande porke la kandela de la lampara ya estava muy kurta i su flama muy flosha, le avia kedado muy poko de azeyte, i otrun poko la kandela ke estava meneyandose ya estava para kayer i amatarse. Empeso a tremblar i se demando de si para si:
«Puede ser ke la fin de una persona seyga tan serka, sin ke eya mizmo lo save?»
En esto, remarko a una otra lampara en platro ke estava serka de la suya. Su flama estava fuerte, su kandela larga i derecha, i su chanaka yena de azeyte.
Demando al vyejo:
«I, a ken apartiene esta lampara?»
« Es solo su kandela ke puedo amostrar a kada uno,» le respondio. Se abolto i empeso a alesharse del lugar.
El Djudyo se kedo ayi todo en tremblando. En supito, oyo un sonido de bafo i kuando abolto su kavesa apersivio un umo ke estava saliendo de una otra etajera. Se rendio kuento ke djusto en este momento, una persona avia deshado la vida. Otra vez abolto su kavesa para mirar de muevo a su lamparo, i apersivio ke solo unas kuantas gotas de azeyte le avian kedado. Despues, miro a la lampara ke estava allado de la suya, i una idea orible se akaparo de el.
Se hue atras i bushko al vyejiziko en kada kanton, ma no lo vido en dingun lugar. En esto, se abolto i tomo la lampara yeno de azeyte ke estava allado de la suya i la aboko a su lampara. Ensupito, el vyejo se aparo i afero su braso kon un punyado komo si era de fierro.
«Esto es la djustisia ke estuves tanto bushkando?» le disho.
Su braso le estava tanto tuyendo ke el Djudyo serro sus ojos. I, kuando los avryo, vido ke el vyejo no estava mas, i ke la kabana i las lamparas avian desparesido. Estava solo en el foresto i oyo el chufle de los arvoles. Se demando de si para si su lampara se avia amatado, i si el mizmo esta ayinda biviendo.
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores. ————————————————————————————————————————————————–
El cuento es muy bueno y muestra una realidad de la vida.
Felicidades