Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul.
Kada semana Gad mos dará artikolos de su kreasion para kompartir kon muestros lektores.

————————————————————————————————————————————————–

Sara en el Palasio de Paro

En segito de una perioda de ambre ke avia esbrochado en Kanaan, Avram se avia desidado de renderse en Ayifto. En su kamino para Ayifto, Avram se avia merikiyado ke los ayiftianos puederian matarlo para apatronarsen de su espoza Sara, ke su ermozura era sin igual.
Se adreso a Sara:

«Ya se ke karar de ermoza soz. Kuando los ayiftianos te veran, siguro ke penseran ke soz mi espoza. Entonses, me puederan matar i arevatarte. Por esto, kale ke les digas ke soz mi ermana, para ke sea tratado kon respekto i ke mi vida sea eparniada.» 

I djusto kuando avian arivado a Ayifto, eskondio a Sara en una kasha. Portanto, los ayiftianos la deskuvrieron, i Sara obeiso a Avram en rakontando ke era su ermana. Kuando los kurtizanos de Paro le reportaron la ermozura de Sara, Sara fue yevada kon el orden de Paro, al harem del palasio, para ser su konkubina.

Sovre esto, Avram fue regalado jenerozamente por el Paro, ke para provar su amor por Sara, le dyo kodreros , vakas, aznos, servidores i gameyos, i le ofresio el payiz de Goshen en Ayifto, para ke los ebreos se aresenten ayi.

Sara arogo al Dio de salvarla de las manos de Paro. I en repuesta a su rogativa, el Dio mando pishin un andjelo para ke atake al Paro.

El andjelo abasho de los syelos kon un palo, i kuando Paro se aserko de Sara para kitar su kalsado, aharvo a su mano. I, kuando Paro se aserko de Sara para tokar su vistimiento, lo aharvo de muevo.
En segito, el Dio desidio de kastigar a Paro i a su famiya en kontraktandoles una hazinura grava, ke se iva amahar solo kuando Sara iva ser liberada.

Paro, en su investigasion para konoser la razon de esta hazinura, deskuvrio ke fue kastigado porke Sara seando la espoza de Avram, no le aparteniya. I se avia muncho ensanyado de saver ke fue enganiado.
Entonses izo yamar a Avram:

«Kualo me izites? Deke no me dishites ke Sara es tu mujer? I me dishites ke es tu ermana? I yo la tomi por mi mujer? Tomala i vate de aki!»

Achakes ke el Dio lo avia kastiggado por su komporto enverso Sara, Paro no izo dingun mal a Avram. En segito, asigun el orden de Paro, Avram kon su espoza Sara, toda su djente kon sus rikezas se metyeron en kamino por el payiz de Kanaan.

La leyenda rakonta ke Paro, impresionado por la intervension divina, avia dado su ija Hagar a Sara en tanto ke su serviente. Se avia eksprimido ansi:

«Mijor es ke mi ija sea una serviente en tu kaza, al lugar ke una mestra en una otra kaza.»

* * *

Los pekados kometidos por los kanaanites paganes son konsiderados en tanto ke el kavzo del ambre ke avia provokado la partensia de Avram a Ayifto.

Al pareser, en akeos tiempos, el asasinato de un marido por un ombre para akapararse de su espoza ermoza era un komporto en uzo. Kuando la pareya de Avram avia arivido a Ayifto, la seguridad i la vida de todos de eyos, kompuestos de famiyas, esklavos i animales dependia de la buena veluntad del Paro. Los ayiftianos ke konsideravan kon indiniasion a este modo de djente eran dispozados de permeterles de kedarsen en sus tierras, solo en resiviendo animales, posesiones diversas, i todo lo ke demandavan i, entre otros sus mujeres ermozas.

El komporto de Avram de prezentar a su espoza en tanto ke su ermana fue severamente kritikado por Rambam Rambam se eksprime ansi:

‘Saveresh ke muestro padre Avram kometio sin saver un pekado grande en prezentando su espoza virtuoza en tanto ke su ermana en una situasion kompremetiendo, achakes de su espanto de ser matado. Devia tener konfiensa en Dio.’

De mizmo, Rambam pensa ke Avram avia kometido un pekado en abandonado la Tierra Prometida achakes del ambre, porke el Dio lo iva sutener i lo iva salvar. Rambam pensa de mizmo, ke este viaje fue la kavza mas despues, del egzilo amargo en Ayifto de los desendientes de Avram.

De otra parte, asigun el kustumbre del puevlo Hurri alkual Avram i Sara apartenian kulturalmente, una espoza puedia ser elevada al rango de ermana de su marido, i esto le akordava una pozision mas alta en la ierarkia sosiala i otras privilejias ke una espoza no tenia. Asigun syertos komentarios, los ayiftianos konosian a este kustumbre, i de este modo, Sara avia gozado de muncho mas respekto des sus parte.
Jozefus Flavius pensa ke el ambre fue provokado por el Dio kon la intision de mandar temporalmente a Avram a Ayifto, porke Avram solo tenia el poder de realizar una mision espesiala.

En estos tiempos, los ayiftianos tenian diferentes kreyensyas. Avram se avia entretenido kon las mas savias personas de Ayifto en refutando estas kreyensyas i en provando la vanitad i la invalidad de sus razones. I les avia ambezado la aritmetika i la astronomia.

Los ayiftianos prezervaron munchas leyendas de sus pasado. Una de estas relata de un kazalino semito ke avia arivado de la Asia a Ayifto enriva de un azno, en el tiempo de Avram, i ke avia komunikado la saviduria a Paro.

De mizmo, durante estos tiempos munchos nomados del payis de Kanaan i de la Mezopotomia uzavan renderson en Ayifto, por diferentes razones i en diferentes sirkonstensias.

—————————————————————-

Gad Nassi