Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul.
Kada semana Gad mos dará artikolos de su kreasion para kompartir kon muestros lektores.

————————————————————————————————————————————————–

Moshe en el Payis de Median

Despues de aver vinsido el Payis de Kush, Moshe se avia aboltado a Ayifto komo un gerreador gloriozo. Esto avia insitado un selo grande en la korte de Paro. Entonses, para salvarse de un intrigo, ansi ke del sanyo de Paro, Moshe se avia fuyido al Payis de Median, en la Peninsula de Sinay.

Ayi enkontro a las syete ijas del Patriarko Yetro en lo ke estavan travando agua de un pozo para dar a bever a sus kodreros. Otros pastores avian arivado a este lugar i estavan mirando de empidirlas. En esto, Moshe intervino i las salvo de los pastores, i las ijas de Yetro pudieron libramente abrevar a sus kodreros.

Kuando aboltaron a sus kaza, las ermanas metieron en koriente a Yetro de lo ke se avia pasado.

Sovre esto, Yetro demando:

«Ande esta esta persona? Deke la deshates ke se vayga? Invitaldolo a komer ande mozotros.»

Kuando Moshe se enkontro kon Yetro, le rakonto toda su estoria. Yetro se akodro de Moshe, ke avia konosido del tyempo ke azia parte de la Korte de Paro, i se konvinsio ke Moshe era destinado a destruir a los Ayiftianos, i aksepto ke se kede en su payis. Portanto, lo emprizono en un pozo.

Antes de renkontrarse kon Yetro, Moshe avia demandado de Tzipora, una de las ijas de Yetro, de kazarse kon eya. Durante todo el tyempo ke Moshe estava en el prezo, Tzipora tuvo kargo de abasteser a Moshe komida i bevienda sin ke su padre lo sepa.

Anyos pasaron kuando un diya Tzipora akodro a su padre ke antes muncho tyempo, avia echado al pozo a una persona, i ke por siguro, esta persona se avia murido, i adjusto:

«Si esta persona esta ainda biviendo, esto es, por siguro, porke es una persona djusta, ke fue salvada por el miraklo del Dio.»

Entonses, Yetro se hue al pozo i lo Yamo a Moshe, ke le respondio. Yetro ke avia konstatado ke en akel momento, Moshe estava orasionanado al Dio, se konvinsio ke Moshe fue salvado por un miraklo, i lo libero.

Yetro avia sembrado en su guerta una vara majika, ke fue kreada en el sejen diya de la Kreasion, el diya de Viernes despues de midi. Esta vara fue dada a Adam, despues fue transmetida a Enoh, Shem, Avraham, Itzhak, Yaakov i Yosef. Despues de Yosef paso a la Kaza de Paro. Yetro la arevato de Paro i la sembro en su guerta. Sovre esta vara era gravado el Nombre del Dio, i las inisiales de las diez desgrasias destinadas a Ayifto.

Yetro uzava de egzijar de kada uno ke se prezenteva para kazarse kon una de sus ijas, de derasinar a este vara de la tierra. Ma, dinguno no avia reushido.

Despues ke fue liberado, Moshe se hue a la guerta de Yetro, topo a la vara, i meldo lo ke estava eskrito en riva. La derasino fasilamente i la uzo despues komo su septro. Kon este akto, Yetro se rendio kuento ke Moshe era destinado a liberar a Israel del esklavajo.

Un otro evenemento ke akontesio durante su sejorno en el Payis de Median i ke desidio de la mision de Moshe, fue la aparision de un arbusto enflamado, ke no se estava konsumando.

Kuando estava guadrando la trupa de kodreros de Yetro, Moshe fue testigo de este fenomeno. En esto, oyo la boz del Dio ke lo enkargo de la mision de salvar a Israel del yugo de Ayifto.

Kuando, Yetro avia akseptado de dar a Tzipora komo espoza a Moshe, avia metido komo kondision ke sus ijo behor iva adoptar las kreyensyas paganes de su trivo, i todas las kreaturas ke nasieran despues, seran konsideradas komo Djudios. Por esto Gershom, el primer ijo de Moshe, no fue sirkonsizado.

Entretyempo, Moshe desidio de tornar a Ayifto. Una vez en kamino kon Tzipora i Gershom, Satan aparesyo en la forma de una kulevra i empeso a englutir a Moshe. Tzipora ke se avia rendido kuento ke esto estava afitando achakes ke sus ijo no era sirkonsizado, pishin lo sirkonsizo a Gershom i a su sangre lo frego a los piezes de Moshe ke su kavesa estava ariento de la boka de la kulevra. En esto, una boz estrenya inkomendo a la kulevra de gomitar a Moshe. I de este modo, Moshe fue salvado de la muerte.

* * *
Despues de la muerte de Sara, Avram se avia kazado kon su konkubina Ketura. I, los Medianites fueron los desiendentes de Avram i de Ketura.

Lo ke avia kavzado a Yetro a emprizonar a Moshe no es klaro. Ay ke pensan ke, Yetro avia pensado en primero, de entregarlo al Paro o al Payis de Kush.

Asigun siertas fuentes, despues ke lo admetio a su famiya, Yetro ensenio a Moshe la organizasion del sistemo djudisiario, i difuzo la kreyensia en Dio entre su puevlo.

Despues de averse aboltado a Ayifto, Moshe mando a Tzipora kon sus dos ijos, Gershom i Eliezer, ande Yetro. I, Kuando arivo a Sinay kon Israel, Yetro vino a vijitar a Moshe kon Tzipora i sus dos ijos. Yetro fue resivido kon grande onor por Moshe, Aaron i los respektavles.

Aaron i Miryam avian kritikado a Moshe por averse kazado kon una estranjera en nomando a su espoza Kushit, lo ke kera dizir una mujer de kolor preta. Portanto, no es klaro si se avian referado a Tzipora mizma o, a la espoza etiopiana de Moshe.

La Biblia nota ke Shebuel, desendiente de Gershom, el primer ijo de Moshe, fue kargado del trezoro. Kuanto a Eliezer, el sigundo ijo de Moshe, la Biblia nota ke tuvo un ijo yamado Rehavia, i ke la desendensia de Rehavia fue muy numeroza.

—————————————————————-

Gad Nassi