Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

La Revolta de Korah 

Korah, ansi ke Moshe i Aaron, apartenia a los Levites, ke fueron nomados a tener kargo del Tabernaklo. La estoria de Korah trata de una epizoda en los empesijos de la istoria de los Ebreos en el dezierto.

Asigun la leyenda, Korah fue el trezorerio de Paro i de esto modo avia amasado buen karar de rikeza. Korah, akompanyado de los ermanos Datan i Aviram i de On del Trivo Reuben, ansi ke de dozyentas i sinkuenta otras personas de alto rango, se avian revoltado kontra la otoridad de Moshe i Aaron. Ansi, se eksprimaron:

«Vos huitesh muy leshos! Muestro puevlo es santo, i kada uno de eyos es santo, i el Dio esta kon eyos. Deke vos metitesh a su kavesa, a la kavesa del Puevlo del Dio?»

Kuando Moshe oyo a esto, se sintio arebashado, i respondio:

«Amaniana en la demania, el Dio amostrara ken Le apartiene i ken es santo. El eskojera la persona ke se aserkara de El. Tu, Korah, i todos tus apoyadores, vini amaniana kon el insenso delantre de El. I El desidara ken es santo!

Agora, ke me oygash vozotros los Levites! No vos abasto ke el Dio de Israel vos aparto del resto del puevlo, i vos aserko d’El en akordandovos de ovrar en Su Tabernaklo? I, agora keresh i ser sus rabinos?»

Despues Moshe envito a Datan i Aviram. Ma, eyos respondieron:

«No vamos a vinir! No abasta ke mos derrokates de un payiz para matarmos en el dezierto? I, agora mos keres kitar i los ojos? No vamos a vinir!»

Kuando Korah i sus apoyadores se arekojeron ahuera de la tienda de la reunion, en frente de Moshe i del resto del puevlo, la gloria del Dio aparesio, i se adreso a Moshe i Aaron:

«Apartavosh de esta asamblea para ke puede meterles una fin».

Ma, Moshe i Aaron fueron trublados i se eksklamaron:

«Dio grande de todo los umanos, kale ke te ensenyas kontra una asamblea entera, kuando solo uno es pekador?»

En esto, el Dio respondio:

«Dize a esta asamblea de estar leshos de las tiendas de Korah, Datan i Aviram».

Moshe akavido a la asamblea:

«Aleshavosh de las tiendas de estas personas malisiozas! No tokesh a a dinguna koza ke les apartiene, sino serash i vozotros englutidos achakes de sus pekados».

I, esto lo izyeron. Datan i Aviram, kon sus mujeres, sus kreaturas i sus inyetos salieron ahuera i se metieron a la entrada de sus tiendas. En esto, Moshe disho:

«De esta manera saverash ke el Dio me mando para ke aga esto todo, i ke esto todo no era mi idea: en kavzo ke toda esta djente muerera de una muerte natural, el Dio no me tiene mandado. Ma, si el Dio azera una koza enteramente mueva, i la tierra avre su boka i los englute kon todo lo ke les apartiene, eyos saveran ke trataron al Dio kon dedenyo».

Asigun ke Moshe eskapo sus palavras, la tierra se avrio en doz i avrio su boka ke los englutio a Korah kon todos de sus apoyadores i kon todas sus posesiones. Eyos abasharon a la foya, i la tierra se serro sovre eyos, en perisando i disparesiendo de la komunitad. Portanto, el Dio no kijo matar a los desendientes de Korah, i sus vidas fueron eparniadas.

Despues de la destruksion de Korah, el puevlo se avia eksklamado kontra Moshe por aver kavzado a esto. En segito, el Dio mando una hazinura para kastigar al puevlo. 14.700 de estos toparon la muerte. I es, solo kon la rogativa de apiedad de Aaron ke esta epidemia kedo.

* * *

Korah es renomado entanto ke una persona de una rikeza enorma. La leyenda rakonta ke avia deskuvrido los trezoros ke Yosef avia guadrado en Ayifto, i ke kalia trezientos mulas para yevar solo las yaves de su rikeza. Mizmo ke es konsiderado en tanto ke un savio, Korah en revoltandose kontra Moshe fue el esklavo de su ambision.

Antes de revoltarse kontra Moshe avia konsultado a su mujer ke lo avia enkorajado:

«Mira lo ke Moshe izo. Izo de sus ermanos el Kohen Grande, i a sus ijos, los ijos de los rabinos.

Korah es de mizmo konsiderado en tanto ke el prototipo de los opozantes kontra la Tora, i kontra la otoridad de los rabinos. Por esto, su kastigo fue dopyo: ser kemado i ser englutido bivo en la tierra.

Portanto, la vida de sus ijos fue eparniada. Esto es eksplikado por el fakto istoriko, ke el Profeto Samuel iva naser de su desendensia.
————————————————————————————————————

Gad Nassi