Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

La Revandikasion de Miryam 

Miryam kon sus ermanos Moshe i Aaron, son konsiderados en tanto ke los lideres del Egzodo de Ayifto. Miryam es deskrita entanto ke una persona korajoza i sinsera. Se rakonta ke avia reprimandado a Paro por su kruelidad, i ke el Paro se avia retenido de matarla porke era ainda una kreatura i achakes de las rogativas de su madre. Kuando Paro avia dekretado de matar a los ijos ke ivan a naser a los djudios, Amram, el padre de Miryam se avia divorsado. Entonses, Miryam lo avia konvensido a kazarse de muevo kon su madre Yohevet, en profetizando ke un ijo les iva naser i ke este ijo iva liberar a Israel. En esta okazion, Miryam avia kantado i baylado en tanyendo el pandero delantre de sus jenitores.
Miryam fue una komadron ke, aunke el orden de Paro, ayudo a munchas madres de Israel a trayer sekretamente al mundo sus kreaturas.
Kuando Moshe nasio, Miryam era mueve anyos mas aedada d’el, i syete anyos mas aedada de Aaron. Su madre miro de guadrar en sekreto a este nasimiento. Kuando esto no era maz posible, metyo a Moshe en un paniri de papirus, i lo depozo en las aguas en el bodre del Nilus. Miryam estava de lesho observando para ver lo ke iva afitar.
La ija de Paro ke se estava aprontando a lavarse en el Nilus, apersivio el paniri. Enbiyo a una de sus esklavas para ke lo trayga, i kuando avrio su mantel, vido al rezin nasido ke estava yorando. La ija de Paro se apiado d’el:
«Kale ke sea una de las kreaturas de los ebreos».
En akel momento, Miryam salto de su lugar:
«Puedo ir a topar una mujer djudiya para engradeser a este bebe para ti?»
«Si, por seguro,” respondio la ija de Paro.
I Miryam hue i trusho a la madre de Moshe para ke tenga kargo de el.

Despues ke los ijos de Israel avian traversado la Mar Korolada i Paro kon su armada se avian aogado, Miryam de muevo avia kantado, baylado i tanyado el pandero, en invitando a las mujeres de adjuntarsen a eya. Este uzo se iva instalar maz tadre durante los anyos para selebrar la viktoria de los kombatantes de Israel kuando retornavan del kombato.
La leyenda rakonta ke en su manseves, Moshe avia komandado a una armia kompozada de ayiftianos i de ebreos, ke avia gerreaodo kontra la Etiopia – yamada en mizmo tiempo ‘Payis de Kush’. Una vez la batalia terminada, Moshe se avia kazado kon una prensesa etiopiana yamada Tarbis.

Miryam kon Aaron, avian por esto kritikado mas tadre a Moshe por aver
tomado el riziko de arebashar su desendensia en kazandose kon una mujer de rasa diferente. Portanto, el Dio avia defendido a Moshe.
Miryam intervino de mizmo kontra Moshe, kuando Moshe se avia apartado de su mujer, Tzipora, porke su divorso iva empidir su prokreasyon.
Otrun fakto sovre el karakter independente i asertivo de Miryam es su revolto kontra el dirito ke Moshe se avia akordado de ekspresarse, el solo, al nombre de Dio. En esto, i Aaron se avia adjuntado a eya. Portanto, eya sola fue kastigada por Dio en kontraktandola la lepra. Miryam fue delivrada de esta hazinura despues ke fue segregada durante syete diyas, grasias a las rogativas de Moshe i Aaron.
Miryam avia asperado a Moshe al lado de un rio, ande se kreo una fuente mirakuloza la noche del primer diya de Shabat despues ke el puevlo de Israel avia salido de Ayifto. Esta fuente iva akompanyar a los ebreos en el dezierto fin a su muerte.
* * *
Miryam se avia kazado kon Hur. Hur avia partisipado en la batalia kontra Amalek. Miryam i Hur fueron los ansestros de Betzalel, ke iva ser el arshitekto del Sanktuario ande las Tabelas de las Komendensas fueron pozadas. Son de mizmo konsiderados entanto ke los ansestros del Rey David. Sus desendientes fueron en mizmo tiempo los fondatores de tres sivdades: Kiryat Yearim, Bet Lehem i Bet Gader.
Miryam es la primera figura feminina de la Biblia ke fue aktiva en la vida sosiala de su puevlo. Konsiderada entanto ke una profetesa i seando el maz aedado miembro de su famiya, sus opiniones fueron respektados.
Otrun aspekto de su personalitad es su lucha por la ekitad en tanto ke una mujer. Lo ke prova la importansa del rolo importante de la mujer en la vida sosiala en akeos tiempos.
Esto es la eksplikasion del uzo de pozar, durante la noche de la selebrasion del Seder de Pesah, una kupa por Miryam al lado de la kupa de Eliyau Anavi.
De mizmo ke sus ermanos, Moshe i Aaron, Miryam murio en el dezierto sin ke pudo arivar a la Tierra Santa. Esto akontesio en el mismo anyo kon la muerte de Moshe i de Aaron.
Miryam muryo en Kadesh, i fue enterada ayi.

————————————————————————————————————

Gad Nassi