Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul.
Kada semana Gad mos dará artikolos de su kreasion para kompartir kon muestros lektores.

————————————————————————————————————————————————–

Dina restituada

Dina es akodrada entanto ke la unika ija de Yakov. Su madre era Lea. Se rakonta ke antes ke nasiera Lea avia arogado al Dio para ke le nase una ija.

Kuando Yakov kon su famiya estavan kampando al lado de la sivdad de Sh’hem, Dina salyo a los kampos para vijitar a las otras muchachas del lugar. En esto, Shehem, el ijo del sovereno del payis, la vido i se tresalio de eya. La arevato i se echo kon eya.

Shehem se avia enamorado de Dina. La trato kon dulsor i Dina se kedo ande el. Shehem avizo a su padre, Hamor, ke se kere kazar kon eya. Hamor se fue ande Yakov a avlarle. Los ijos de Yakov no estavan en la kaza i kuando en aboltando, supyeron lo ke avia afitado, se ensanyaron i se endinyaron muncho.

Ansi, avlo Hamor:

«Mi ijo Shehem se enamoro de vuestra ija. Te rogo de permeterla de kazarse kon el. Kazavosh kon mozotros, damos a vuestras ijas a mozotros, i toma a las muestras para vozotros. Puederash morar kon mozotros, i este payis sera avierto para vozotros, mora ayi en komersando i en apropriandovos de sus tierras».

Shehem adjusto en adresandose a Yakov i a sus ijos:

«Demandame todo lo ke keresh, mismo de maziya de los regalos de un kazamiento, i ve los vo dar. Solo, dame a esta manseva por novya».

Los ijos de Yakov le respondieron:

«No puedemos akseptar a dar a muestra ermana a una persona ke no es sirkonsizada, porke esto sera un afronto para mozotros. Solo, en una kondision puedemos konsintir a tu demanda. Si tu, i todos los ombres de tu payis seran sirkonsizados. Entonses, vos daremos a muestras ijas, i tomaremos a las vuestras. I moraremos kon vozotros para devenir un solo puevlo. I, en kavzo ke no akseptarash a muestra propozision i no vos sirkonsizerash, vamos a tomar a muestra ija, i mos vamos a ir de aki».

Estas palavras plazieron a Hamor i a su ijo Shehem. Achakes de su pasion por Dina, Shehem se avia pishin sirkonsizado. El padre i el ijo kuando arivaron a la puerta de sus sivdad, se adresaron a los sivdadinos:

«Esta djente se komportaron amikalmente kon mozotros. Vini les akordaremos de bivir i de komersar en muestro payis. Muestras tierras son bastante anchas. Tomaremos por mujer a sus ijas, i les daremos a muestras ijas por mujer. Solo en la kondisyon ke kada uno de muestros ombres se sirkonsizera, eyos son prontos ke devengamos un solo puvlo. Keresh ke sus betalyo i sus bien mos apartengan? Solo kale ke seamos de akordo kon eyos, i eyos moraran kon mozortros».

En segito todos los ombres de Sh’hem ya se avian sinkosizado.

Al treser diya de sus sirkonsizion, los trivos de Shimon i Levi, los doz ermanos enteros de Dina, atakaron la sivdad i mataron a Hamor i a Shehem, i a todos sus ombres. I retornaron a Dina de la kaza de Shehem. Despues, todos los otros trivos ebreos i eyos atakaron la sivdad en depuyandola de todos sus bienes i de sus betalyos, i kapturando kon eyos a las bivdas i a las kreaturas.

En esto, Yaakov se avia adresado a Shimon i a Levi:

«Mos trushitesh muncha beala en aziendomos aboreser por los abitantes de este payis. Eyos son maz numerozos de mozotros i se pueden unir entre eyos i atakarmos. Ansi, me pueden destruyir a mi i a toda mi kaza».

I eyos respondieron:

«Kalia ke tratara entanto ke una putana a muestra ermana?»

* * *

Dina tenia kinze anyos kuando salio sola a los kampos i fue violada por Shehem. Posiblamente ke esto avia afitado en un diya de fiesta, asigun ke konosomes de los evenemontos semejantes rakontados en la Biblia.

Nunka se savera lo ke le avia afitado egzaktamente, i kualo fue su aktitudo enverso Shehem.

La Biblia reporta ke Dina emigro despues a Ayifto. Asigun una leyenda fue abandonada por Yakov i fue topada i adoptada por Potifar, el ministro de Paro. Fue rekonosida por Yosef su ermano, grasias a un amuleto ke su padre le avia dado.

Otruna leyenda rakonta ke estava prenyada i ke avia arivado Ayifto kon su eshuegra para evitar el aiso de sus ermanos kontra su kreatura. I ke paryo a Osnat, ke iva ser la mujer de Yosef, kuando fue el Ministro de Paro. I ke Yosef se avia muncho emosionado en rekonosiendo en Osnat a su ermana Dina i en akodrandose de su chikez.

—————————————————————-

Gad Nassi