eSefarad Noticias del Mundo Sefaradi
Djudios en la Revolta Grega (I)
LOS MASAKROS DE 1821
——————————————————————————————————
El siglo XIX es markado por los ajitasiones de los payises del Balkan. En segito de la Revolusion Franseza, la idea de un muevo orden politiko i sosial empesa a kreser en la Evropa. En los Balkanes, esta idea topa su kamino en las aspirasiones nasionalistas ke provokan luchas armadas por la independensia etnika i politika. En akeos tiempos, estos payises eran basho la soverenia del Imperio Otomano; i ansi, empesa en el Balkan el proseso del desmembramiento del Imperio. De mismo, las konsekuensas nefastas de estas perturbasiones se manifestan i en el mundo djudio. Este artikolo trata de estas konsekuensas, en koneksion kon la insureksion grega i la riposta a la egzekusion del Patriarko grego de Estanbol en el anio 1821.
——————————————————————————————————-
En 1821, una armada de volontarios komandada por Alexandros Ypsilantis aprovo en vano de provokar una revolta en la Romania kontra los otomanos. Esta tentativa ke fue atabafada por las fuersas otomanas, fue segida por una insureksion de los gregos en Morea(1). La populasion turka de los lugares ke kayeron en las manos de los revoltados gregos fue masakrada en masas. Poko de eyos sovrebivieron… Es rakontado ke kuando esta novedad arivo al Sultan otomano, Mahmut II, su sanio fue tan grande ke el ordeno de matar a todos los gregos i ke este orden fue retirado en segito de las suplikasiones de los dirijentes. Portanto, miembros de la populasion grega de Estambol fueron masakrados i, munchos dinyitarios de la Komunitad grega del Imperio fueron egzekutados kon el orden del Sultan. Entre eyos, se topa el Patriarko grego de Estambol, Grigorios V.
Moїse Franco, en bazandose sovre el testimonio de personas ke asistieron a la egzekusion del Patriarko, la deskrive en estas linias:
“… El dia de 27 April 1821, primer dia de la Paskua grega, el vezir grande Benderli Ali Pasha, segido de un batalion de Yanisarios, se rendio ande el Patriarko de Fener. Kon el orden de Benderli, el Patriarko fue sezisado i enforkado en la prezensia del publiko.
Entre esta djente, ke era kompozada esansialmente de Gregos, se avian mesklado unos kuantos djudios, ke la kuriozitad avia atirado. Benderli Ali Pasha en remarkandolos, les interpelo en estos terminos:
‘Seash bienvenidos (hosh geldiniz) vozotros, Djudios! Aki, enforkado, vuestro enemigo i el muestro! Arastaldolo ala mar; vo lo esto ordonando.’
Kon kerer o sin kererlo, tres djudyos ke la kronika konservo sus nombres: Mutal, Bichachi i Levi, arastaron el kadavro fina el bodre del Kuerno de Oro…”(2)
Franco eskrive ke este evenemento fue al orijin de una leyenda absurda. Los gregos izieron sirkular la novedad ke eran los jjudios ke avian inspirado al governo otomano la idea de esta matansina. I kuando estos bruidos arivaron ala Gresia, se estuvo rakontando ke eran los djudios de Estambol ke avian matado al Patriarko.
Los Gregos reajisaron kon kruelidad a estos rumores. Aparte del masakro de la populasion djudia de Morea, delkual vamos a tratar mas abasho, los djudios fueron el objeto de otras manifestasiones de atrosidad.
Odesa, 1821
El puerpo del Patriarko fue rekuparado de la mar por un nave grego ke lo yevo a Odesa, ande fue enterrado kon grande onor. Despues de la seremonia en la Eglisia grega, kuando la prosesion funeraria estava en kamino por el semeterio, rumores ke los djudios eran responsables de la matansina del Patriarko i de los otros gregos del Imperio otomano, empesaron a korrer. Ansi, a la tornada del simeterio, deklansho en Odesa, el primer pogrom kontra los djudios en la Rusia. Aparte de los gregos de la sivdad i los marineros gregos ke eran prezentes en la seremonia, i otros sivdadinos de Odesa partisiparon a este pogrom. La djente atako a los djudios en sakajando sus kazas, sus butikas i sus etalasiones. Djudios fueoron matados i munchos de eyos fueron mutilados.
Es en Odesa ke se avia fondada la sosietad sekreta Philiki Etaira –‘Fratenidad Amikala’ en grego – ke avia inspirada la revolta de Ypsilantis i la Gerra d’independensia de la Gresia, ke la avia segido. Los gregos se avian aresentado en Odesa durante los dos primeros dekados del siglo XIX i kontinuaron a ser dominantes en la vida de la sivdad.(3) De mismo, partisiparon aktivamente en los pogromes futuros kontra los djudios. Un otro pogrom en esta sivdad, akeo de 1871, iva empesar i el, en el entorno de esta misma eglisia. Esta ves los Djudios fueron kalomniados de arovarsen la krosa de la bariera de la eglisia. Mas despues, la krosa fue topada ariento de la eglisia. Portanto, el pogrom avia turado tres dias en respandiendose a toda la sivdad.
El Masakro en la Nave
En Pesah del anio 1821, serka de 50 Djudios salieron de Yafo sovre una nave. Eyos fueron kapturados por marineros gregos. 38 de eyos fueron matados i echados ala mar en vengansa a lo ke los djudios avian echo al Patrriarko de Estanbol. Mismo el montante de moneda ke los djudios eran prontos a pagar no avia ayudado. Djudios orijinarios de Yanina ke estavan en la misma nave fueron salvados grasias a la intervansion de un papaz grego, ke rogo a los bandidos de apiadarsen de eyos en deklarando ke, porke seando de avla grega, eyos son diferentes de los djudios de la Turkia i son aserkados a los gregos.
Una estoria estrania akompanya este evenemento. Es reportado ke a Yehuda Yakoel, un Djudio de Yerushalayim, no le avia korrido ni una gota de sangre, mismo ke los bandidos lo avian aharvado para matarlo. Alafin, los Gregos akseptaron, kontra una suma de moneda, de no matarlo.
Despues ke arivaron a la Gresia, estos Djudios de sus espanto se konvertieron al Kristianismo. Eyos fueron detenidos en el prizion durante tres anios fina ke las fuersas otomanas los liberaron i los enbiaron a Rodus.(4)
Los Masakros en Morea
Kon la konkesta otomana de los Balkanes en los siglos XIV i XV, avia empesado una era de libertad relijiosa i sosiala por los djudios, ke avian sufrido de la opresion de Bizans. Los djudios de Gresia fueron konsiderados entanto ke afiliados a los turkos por los gregos, ke eyos de sus parte se konsideravan entanto ke los eredores del Imperio bizantino.
Los djudios de Morea fueron el objeto de las manifestasiones de enemistad de la parte de armadas kristianas en gerra kon los otomanos i durante las rebeliones sporadikas de los gregos kontra la dominasion otomana ainda en el siglo XVIII. En 1821, en segido de las novelas konsernando la matansina del Patriarko i de los gregos, los gregos kontinuaron a masakrar las komunidades djudias de la Morea ke estavan okupando, de mismo ke otras komunidades, komo akeas de Thebes, Vrachori (Agrinia), Atika, Epirus, i de la Valahia en la Romania, ande la revolusion grega avia esbrochado en primero.
Es estimado ke solo en Morea, 5000 Djudios perieron sus vida durante esta perioda.Otros se refujiaron en Korfu ke era akel tiempo un protektorato ingles i en parte en Khalkis i Volos ke estavan ainda basho la dominasion otomana. Ma, ni los ke se refujiaron en Korfu no fueron en segito eparniados de la atrosidad grega.
Ansi, komunidades istorikas komo akeas de Patras, Sparta, Tripolitza, Mistra, Kalamata, Korintos, Argos fueron desimadas i la egzistensia djudia en Morea fue anihilada por syempre. Es solo en Patras, el porte en el Norte de la Morea, ke en 1905 la sola komunitad djudia en Morea fue formada de muevo(5).
De estas komunitades esansialmente romaniotas, ke sus raises remontan ala Edad Elenista, mos kedan oy, aparte de siertos vestijes arkeolojikos, solo las alkunias komo Mori, Misistrano, Kalomiti, i otros….
* * *
La enemistad de los Gregos kontra los djudios se avia respandido al todo el mundo grego. De mismo, los djudios de Aleksandria, de Anatolia i de Saloniki fueron i eyos en parte viktimos de la atrosidad grega. Un livro publikado en 1822 reporta:
“…Ma, en sus vengansas, los gregos no se bornaron al masakro de los Turkos; konsideraron a los djudios entanto ke sus enemigos los mas odiosos… …Abastava de ser turko o djudio para aparejarse al suplisio…”(6)
Una otra ovra, reporta el masakro ke akontesio en la sivdad de Vrachori, ande bivia en esta perioda 500 famiyas turkas i 200 djudios:
“…Los turkos i los djudios… desharon sus armas despues de aver resivido el promeso (de los gregos) konsernando sus sekuridad personal. Este promeso fue imediatamente violado. El masakro empeso kon los djudios. Ombres, mujeres i kreaturas fueron abatidos kon sangre frio, en sirkonstensias de kruelidad atrosa. Los muslumanos… partajaron despues el mismo destino…”(7)
*
La puerta prensipala del Patriarkato de Estanbol, ande el Patriarko fue enforkado, kedo serrada de akel dia endelantre. Asigun siertos rakontarios, esta puerta se avrira, solo kuando un dinyitario turko de grande importansa sera enforkado en este mismo lugar.
——————————————————————————————————-
(1) De muestros dias, konosida lo mas entanto ke Peloponez, Morea es el nombre del Sude de la Gresia, formado por una preskisla grande separada en su Norte por el kanal de Korintos del resto del payis.
(2) Franco, M., Essai sur l’Histoire des Israélites de l’Empire Ottoman, Depuis les Origines jusqu’à nos Jours, (U.I.S.F., Paris: 1980), 132.
Las informasiones dadas por Franco no son kompletas. Antes ke fue arastado a la mar por los djudios, el puerpo del Patriarko fue eksposado durante tres dias.
(3) Herlihy, Patricia, Odessa: A history, 1794-1914, (Cambridge, MA. Harvard University Press: 1986), 125-7.
(4) Rabinovich, Mihael, “Praot haYavanim beYehudim beShnat 1821” (Pogromes de los gregos kontra los djudios en el anio 1821), (Mizrah ve Maarav, III, 1929), 152-6.
(5) Plaut, Joshua Eli, Greek Jewry in the Twentieth Century, 1913-1983, Patterns of Jewish Survival in the Greek Provinces before and after the Holocaust, (Associated University Press, 1998), 28-9.
(6) Raffenel, M. C. D., Histoire des Evénements de la Grèce, suivie d’une Notice sur Constantinople, (Dondey-Dupré, Paris: 1822), 116-7, 121.
(7) Finlay, George, History of the Greek Revolution and of the Reign of King Otho, Zeno, London 1971, 164-5.
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
