eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
YEHU
El trofeo sanglante de una revolta
Yehu fue Rey del Estado de Isreal, de 842 fin’a 814 AE. Antes de detronar a Yoram – ijo de Ahav i Jezabel – fue el Komandante de la estasion militar de Ramot-Gilead en el Norte de la Transjordania. Es de este lugar ke avia arivado a Yizrael i matado a Yoram.
Aparte de Yoram, avia matado i a Ahazia, el Rey de Yuda, kon sus parientes. Despues, avia masakrado toda la famiya de Ahav kon la Reyna-madre Izabel, i todo el sirkolo de elitos de la korte i aserkados a Ahav.
Yehu fue konsekrado komo rey, en Ramot-Gilead por un emisario del profeto Elisha. Elisha se avia opozado a Ahav i a su desendensia, i avia luchado kontra Jezabel por aver establisido el paganismo.
De mizmo, Yehu despues ke suvyo al trono, avia ovrado kon grande fervor para meter fin al kulto tiriano, en matando los pretros de Baal i Ashera, i en destruyendo sus templo.
Portanto, Yehu no avia tokado a los altares del ‘Ternero de Oro’, ke fueron establisidos en Dan i en Bet El, kon la separasion de los doz estados ebreos – Yuda i Israel.
De otra parte, achakes de la la matansina de Jezabel i de Ahaz, el Rey de Yuda, los atadijos de la tripla aliansa entre los estados de Israel, Tir i Yuda se deterioraron, en provokando la izolasion de Israel, i en enkorajando el Estado Arameo en Damasko, a atakar a Israel.
Por esto, Yehu fue obligado de provar su fidelitad a Shalmanezer, el Rey de la Asiria i de pagarle un tributo. Entonses, la Asiria atako a Aram, su Rey, en enserklando Damasko, i en devastando sus sivdades. Esta kampanya militara ke avia turado de 841 fin’a 838 AE, fue provechoza por Yehu en asigurando su supremasia por un sierto de tyempo.
Djusto en segito de la ataka de la Asiria, los Arameos se rekovraron basho sus rey Hazael i reusheron a penetrar en el teritorio de Israel i konkestar una vasta parte de la Transjordania. Despues de unos kuantos anios, Hazael atako de muevo a Israel, en konkestando esta vez, una parte del Ueste de Transjordania fin’a ke arivo al teritorio de Yuda, en ovligando su Rey Yoash de pagarle un tributo. El menaso de Aram sovre Israel, iva kontinuar i durante el reyno de Ahazia, el ijo de Yehu, ke lo avia suksedado.
La kariera de Yehu fue yena de sangre, durante todo su kamino, i los masakros ke provoko, kontinuaron a ser akodrados en la Biblia, muncho mas despues de su muerte. Despues de ser konsekrado komo Rey, se avia presipitado kon sus soldados a Yizrael, ande Yoram, firido en el kombate kontra los Arameos, se estava deskansando. Lo avia matado kon sus propias manos en travando una flesha a su korason. En esto, su sovrino Ahazia, el Rey de Yuda, ke estava vijitando a Yoram, empeso a fuyirse. Portanto, fue aferrado por los soldados de Yehu en el paso de Gur, i firrido mortalmante. Pudo apenas arivar a Megido, ande sukombo a su yaga.
Kuando arivo a Yizrael, Yehu mando una letra a sus komandantes en la kapitala Samaria, demandandoles de kontar los prenses de la Kaza de Ahav. Asigun su orden, toda la famiya de Ahav fue maskrada, i le trayeron sus 70 kavesas, ke fueron amasadas en doz kolonas en la entrada de su rezidensia. En segito, Yehu topo a los parientes de Ahazia – Rey de Yuda – ke se avian arekojido en una kaza de arapamiento de la lana, i masakro otras 42 personas en atadijo kon la famiya de Ahav.
I kuando entro a la kapitala Samaria, Yehu komendo el mizmo, la defenestrasion de Jezabel en trespizando su puerpo kon su karosa, i abandonando su kadavro a los perros.
La desimasion de los miembros de la famiya reala de Yuda i de Israel, es eksplikada por la apreansion de Yehu ke estos puederian endanyar su supremasia i akea de sus desendientes, en aspirando al trono de Israel.
* * *
La revolta de Yehu, aparte de la armada, fue suportada i por la klasa prove del payis, ke estava akablada por la penuria durante el reyno de Ahav i dezaprovando la vida de rikeza i de libertinaj de la aristokrasia.
De otra parte, la ambision de Yehu por el poder devanso a su dezeo de servir el Dio de Israel. Esta konviksion deriva del fakto ke Yehu, aun ke avia destruido el paganismo fenisiano en su payis, no avia tokado a los altares del ‘Ternero de Oro’ en Dan i Bet El. De este modo, Yehu kijo okultar la influensa del Bet haMikdash en Yerushalayim, basho la dominasion del Estado de Yuda, i evitar todo tentativo de la dinastia de David, de unifiar los doz Estados.
Yehu fue Rey de Israel durante 28 anyos. Su reyno, aparte de los masakros ke provoko, es markado i por la desepsion de su sumision a la Asiria i en segito, al Estado Arameo.
—————————————–
Gad Nassi
