eSefarad Noticias del Mundo Sefaradi
Suzanna i la Kalomnia
Yoakim bivia en Babel. Se avia kazado kon Suzanna, ke era una mujer muy ermoza i muy onesta, ke respektava la Ley de Israel.
Yoakim de su parte era bastante riko i muy respektado. Tenia una guerta ancha i maravioza al lado de su kaza, ande los djudios uzavan a vijitar.
En este tiempo egzistian dos djuezgos aedados. Kada uno ke bushkava djustisia uzava de adresarse a eyos, i eyos uzavan a vijitar ande Yoakim. Afito ke estos djuezgos metyeron ojo a Suzanna i desidaron de seduizirla.
Kuando la djente salian de su kaza, Suzanna salia a echar un torno en la guerta de su marido. Los djuezgos ke avian remarkado a esto, un diya se metyeron detras de eya i kuando la observaron, se les pujo mas el dezeo de posedarla.
Esto les avia tomado el tino, i se alesharon de los Syelos fina ke no estavan puediondo inchir korektamento sus doveres. Mismo ke kontinuaron a segirla i a observarla kon aviditad kadal diya, no se avuaron sus pasion, achakes de sus verguensa i lo ke dezeavan azer kon Suzanna.
Un diya, disho el uno al otro:
«Ven, mos iremos a kaza, porke ya vino la ora de komer».
I kada uno se hue en su direksion. Kuando aboltaron en medio kamino para verla a Suzanna, se renkontraron de muevo, i no teniendo otro remedio se konfesaron sus dezeo. Entonses, se desidaron de toparsen de muevo en una okazion kuando Suzanna sera sola.
Un diya, Suzanna, asigun su uzo se estava arodeando en la guerta kon sus dos mosas. Era un diya de kalor i por esto se estava aparejando a tomar un banyo.
Aparte de los dos viejos ke la estavan observando en eskondiendosen, no avia dinguno en la guerta. Suzanna se adreso a las mosas:
«Trayedme un poko de azete de azetunas i shavon, i serrad las puertas de la guerta para ke me pueda lavar».
Eyas izieron asigun lo ke les fue ordenado, i salieron ahuera de la guerta sin apersivirsen de los viejos ke se estavan eskondiendo.
En esto, los doz viejos korrieron ande Suzanna, i le disheron:
«Agora ke las puertas de la guerta estan serradas, i dinguno no mos esta viendo, seando ke mos enamorimos de ti, aserkate de mozotros. I en kavzo ke no konsentiras a muestro dezeo, vamos a afirmar ke un mansevo estuvo kon ti, i ke pormo de esto, tuvites kargo de mandar ahuera a tus mosas».
Suzanna se avia revoltado. Respondio en sospirando:
«Esto es una trampa, delakuala no ay salvasion. Si me someto a vuestro dezeo, esto se eskapara kon mi muerte. I sino, no puedere salvarme de vuestras manos. Mi desizion es de no konsentir, prefero kayer en vuestras manos al lugar de kometer un pekado kontra el Dio».
Kuando Suzanna empeso a echar gritos, i eyos echaron gritos. En esto, kada uno de eyos korrio i avrio las puertas de la guerta. I las mosas ke oyeron a estos gritos se presipitaron para ver lo ke estava afitando.
Kuando los djuezgos kontaron lo ke avian kombinado kontra Suzanna, las mosas se enkantaron i se aguervensaron, porke nunka no se avia oyido una semejante koza.
Al diya segiente, una munchidumbre de djente se avian arekojido en la kaza de Yoakim, el marido de Suzanna. Los doz djuezgos ke aparesieron, kon la intision de kondanar a la muerte a Suzanna ordenaron:
«Trayelda a Suzanna, ija de Hilkiya i mujer de Yoakim!»
I Suzanna se prezento, akompaniada de sus jenitores, sus kreaturas i todos sus parientes. Lagrimas estavan kayendo de todos los ke estavan kon eya.
Suzanna estava envelada porke era una mujer muy delikada i muy linda para ke se puede mirarla. Portanto, los dos maldichos ordenaron ke se desvelga para pueder echar otra vez un ojo a su ermozora. Yenos de lagrimas, sus ojos estavan mirando a los Syelos porke tenia konfiensia en Dio.
Los dos vyejos se alevantaron en medyo de la djente i apuntaron a Susanna:
«Kuando estavamos kaminando solos en la guerta, esta mujer entro kon dos de sus mosas. Les demando de serrar las puertas de la guerta, i a las mosas las embiyo. En esto, un mansevo ke se estava eskondiendo vino ande eya i se echo kon eya. Mozotros estavamos en un kanton de la guerta. Kuando vimos a esta desgrasya, korrimos a eyos. Mismo ke eran estreniados en kometiendo este krimen, no pudimos aferarlo, porke era mas fuerte de mozotros. Avrio la puerta i se fuyo ahuera».
La asamblea se avia kreyido en sus palavras, porke eran aedados i djuezgos del puevlo. I kondano a Suzanna a la muerte.
Sovre esto, Suzanna se eksklamo:
«O! Sinyor de los Syelos. Tu sos El ke konose todo lo ke es guadrado i todos los sekretos. I ya saves ke sus testimonios son falsos. Fui kondenada a la muerte, mismo ke no ize nada de negro, estos, de muevo, konspiraron kontra mi».
El Dio oyo a sus rogativas. I kuando la estavan yevando para egzekutirla, esperto la alma santa de un mansevo, yamado Daniel:
«Yo no sera parte en la sangre de esta mujer inosente».
Todos aboltaron sus kavesas a Daniel.
«Kualo keres dizir kon estas todas palavras?»
Daniel se alevanto i les respondio:
«Lokos sosh kualo sosh? Para kondenar a la muerte a una ija de Israel sin verifiar los faktos i sin estar siguro de todo lo ke vos fue prezentado? Djuzgaldala de muevo. Porke estas personas testigaron falsamente kontra eya «.
Entonses, toda la djente se abolto a sus lugar. Los savios disheron a Daniel:
«Ven! Asentate kon mozotros para aklararmos. Porke este dirito te fue dado por el Dio».
Daniel:
«Apartad a estos dos a una distansa para ke no puedan oyir lo ke kada uno dira. I yo los va investigar».
I demando a kada uno de eyos:
«Debasho de ke arvole los vitesh estrenyados?»
«Debasho del arvole de almastigo,» respondio el primero.
«Debasho de un arvole de de roble,» respondio el segundo.
Daniel:
«Vos izitesh end’uno para satisfezar vuestro dezeo, i despues para asasinar a una ija de Israel. Avlatesh mintiras al perikolo de vuestras vidas. Agora, el Andjelo del Dio vos esta asperando kon su espada para kortar a kada uno de vozotros en dos i destruirvos».
En esto, toda la asamblea echo gritos de revolta, i de lores al Dio porke los avia liberado de estos dos malisiozos, en las manos de los kualos avian entregado sus destino.
Daniel los konvensio para kastigarlos en la manera del verdikto ke kon sus testimonyo falso avian proklamado. Ansi, sangre inosente no fue vertida en akel diya, i eyos fueron egzekutidos asigun la Ley.
Hilkiya i su mujer kon Yoakim i todos los miembros de sus famiyas rengrasiaron al Dio por aver liberado a Suzanna de esta kalomnia.
Despues de esto, Daniel gozo del estimo de su puevlo i devino uno de los mas ilustres profetos de Israel.
* * *
Esta estoria ke se topa en la treslasion al Grego de la Biblia es referada a la epoka del egzilo del puevlo djudyo en Babel. Al pareser su primera version ke fue redaktada en Ebreo o en Arameo fue pedrida.
—————————————–
Gad Nassi
————————————————————————————————————————————————–
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
