eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
Naaman Kurado por Elisha
Naaman era un komandante arameo distengido. Eroe de munchas viktorias, era apresiado por su Rey BenHadad, ke le avia konfiado de komendar a su armada. Portanto, avia kontraktado la lepra i, malgrado su reputasion i su rikeza, dinguno no avia reushido a kurarlo de esta hazinura.
Bivia en su kaza, una muchacha djudia ke servia de mosa a su mujer. A esta muchacha su armada la avia kapturada en una de las atakas en el teritorio de Israel.
Uno de los dias, esta muchacha se adreso a la mujer de Naaman:
«Keria ke tu marido vayga a Samaria para ver el Profeto. I, siguro ke el lo kurara de la lepra«.
En segido, Naaman rakonto al Rey lo ke la muchacha avia dicho, i el rey le respondio:
«Te va darte una letra de rekomendasion, i tu la yevaras al Rey de Israel«.
Sovre esto, Naaman salio en kamino, tomando kon el 750 okkas de oro, 750 okkas de plata i diez sakos de vistido, para darlos en regalo. En la letra estava eskrito:
«Kon esta letra te prezento mi servitor Naaman. Te rogo de azer todo el menester para kurarlo de su hazinura«.
Kuando el Rey de Israel meldo esta letra, se le arevento el fiel i se travo los kaveyos, disho:
«Este me mando a un leprozo para kelo kure! Es ke so el Dio, ke puede dar i tomar la vida? Parese ke esta bushkando un preteksto para atakar de muevo a muestra tierra«.
Kuando Elisha, el Profeto del Dio, oyo el komporto del Rey, le mando un mesaje:
«De ke este ravyo? Mandalo a este Naaman ande mi, i de este modo se rendera kuento ke egziste un verdadero Profeto del Dio en Israel«.
Sovre esto, Naaman, kon sus kavayos, gameyos i sus karosas se hue a la kaza de Elisha. Ma, fue resivido en la puerta por el servante de Elisha ke le transmetio este mesaje:
«Va i undate syete vezezes en las aguas del Rio Yarden. De este modo tu kuero va vinir en si i te amaharas de la lepra”.
Naaman se avia buen karar enyervado:
«Me avia paresido ke por siguro Elisha iva salir de su kaza para resivirme. Me estava kreyendo ke iva pasar su mano sovre la lepra, i en bendiziendo al nombre de su Dio me iva kurarme! Los Rios Abana i Farfar en Damasko no son mijores ke todos los rios de Israel endjuntos? Deke devo de lavarrme en uno de estos rios para ser kurado?”
Naaman ensanyado se abolto de su kamino i empeso a avansar verso la Siria. Ma, sus ofisieres aprovaron de diskutir kon el lo ke se avia pasado:
«Komandante, si el Profeto te propozava de azer una koza impresionante, no la ivas a azer? Kale ke agas lo ke te rekomendo kuando te disho simplamente de ir i de lavarte, i de este modo, ser amahado«.
Naaman, konvensido kon estas palavras, abasho al Rio de Yarden, se undio syete vezes, asigun ke el Profeto del Dio le avia rekomdendado. I su karne se arebivio komo la karne de una kreatura, i se sano!
Despues, Naaman kon todo su eskorto se hue ande Elisha, el Profeto del Dio, i le disho:
«Agora ya se ke no ay otro Dio en el mundo entero ke el Dio de Israel. Aksepta por favor mis regalos«.
Elisha respondio:
«Todo el tiempo ke mi Dio egziste, no akseptare dingun regalo«.
Mismo las rogativas de Naaman, Elisha refuzo sus regalos.
En esto, Naaman disho:
«Bueno, si es ansina permeteme de kargar dos yugos de mulos de tierra de tu payis, i de yevarlos kon mi. De agora endelantre, no va ofrisir dingun sakrifisio a dingun dio mas ke el Dio de Israel. Portanto, el Dio ke me pardone kuando me aboko i yo, kuando mi rey vijita el templo del dio Rimon para arogarlo i se detiene en mis brasos, i se aboka«.
del Dio le avia rekomdendado…
«Vate en paz,» Elisha respondio. I, Naaman se metio en kamino.
Portanto, Gehazi, el servante de Elisha, disho de si para si:
«Mi patron no kalia ke deshara a este Arameo irse sin ke aksepte sus regalos. Todo tiempo ke el Dio esta kon mozotros me va meter detras d’el i va mirar de tomarle kualakere koza«.
Gehazi se metyo detras de Naaman, i Naaman kuando lo remarko, abasho de su karosa, i le demando:
«Es ke todo esta en regla?»
«Si,» le respondio Gehazi. «Ma, mi patron me mando para dizirle ke dos profetos mansevos abasharon de la kolina del payis de Efraim, i los kere aregalarlos kon 75 okkas de plato i dos sakos de vistido«.
«De todo modo, toma 150 okkas de plato,» insistio Naaman. I, le dyo i los dos sakos de vistido, i los mando kon sus servantes para ke los yevan kon Gehazi. Portanto, kuando arivaron a la kolina, Gehazi tomo a estos regalos, mando atras a los servantes, i metyo a los regalos en su kaza.
Kuando se hue ande Elisha, Elisha le demando:
«Ande estuvites Gehazi?»
«No estuve en dingun lugar,» Gehazi le respondio.
Ma, Elisha le demando de muevo:
«No supites ke mi espirito estava ayi kuando Naaman abasho de su karosa para avlarte? Agora es el tiempo de resivir moneda i vistido, i vinyos i kodreros i vakas i servantes? Achakes de lo ke izites, tu i tus ijos i los ijos de tu ijos sufriran de la lepra de Naaman por siempre«.
Kuando Gehazi salio de la kamareta, ya estava leprozo, i su kuero era
blanko komo la inyeve.
* * *
Asigun la leyenda, Naaman, antes de renkontrarse kon Elisha, avia muy probablamente kombatido kontra el Reynado de Israel. Portanto, dezesperado por su hazinura, avia demandado de su Rey la permision de vijitar en Israel para ser kurado.
Elisha al lugar de resivirlo en persona, mando a su servante para transmeterle su konsejo. De este modo, Elisha kijo dar a entender ke solo la Fey en el Dio de Israel, i no los onores, lo puederen kurar.
En el empesijo, Naaman se sintio umiliado achakes ke no fue resivido por Elisha. I, no puediendo realizar de ke modo el Rio Yarden puederia ser superior a los rios de Damasko, se apronto a tornar a su payis. Portanto, sus servidores reusheron a konvenserlo de azer lo ke el ombre del Dio le avia rekomendado.
Enfin, Naaman es kurado, resivido i bendizido por Elisha.
De mismo, el fakto ke Elisha no aksepto dingun regalo de Naaman, es la ekpresion de su kreyensya ke Naaman devia su kurasion solo al Dio. El komporto de Gehazi, el servante de Elisha, kontredize a esta kreyensya i el es kastigado.
Los dos kargos de tierra de Israel ke Naaman tomo kon si eran destinados
a la fragua de un sanktuario al Dio en su payis.
—————————————–
Gad Nassi
